A dinna ngaia ding nghet turin Blatter an hriattir

FIFA president aṭanga a ban leh loh thu sawitu Sepp Blatter chu a dinna ngaia dingnghet tur leh a thu zuk tawh lo turin FIFA hruaitute'n an hriattir.

June 2 khan Blatter hian FIFA president aṭanga a ban thu a sawi a, amah thlaktu tur hi kumin Decmber-ah a nih loh chuan nakum kum tir lama thlan hman a nih beisei a nih laiin kar hmasa khan FIFA president aṭanga a ban loh thu a sawi a ni. Hetianga a thusawi hmasak a zuk leh avang hian Blatter chu FIFA hruaituten an khak ta a ni.

FIFA audit and com­pliance committee chairman Domenico Scala chuan, "Kan thuneihna hmangsuala duh duh dana khawsakna hun chu a tawp tawh. Blatter pawh tiamin FIFA hruaitu zawng zawngte hnena ka sawi duh chu inthlak danglam tura hmalam kan panna kawngah hian kan thu leh hla neih tawh sate zuk mai mai loa FIFA hotu lu thlak kan tumna pawh kaltlangpui ngei tura ke kan pen a ngai a ni," a ti.

A ṭum nga nana FIFA president atan thlan tlin a nih aṭanga a ni linaah Blatter hian, "FIFA member-te aṭangin thlawpna ṭha tak hmu mah ila hmun hrang hranga football khawvela inhnamhnawihte aṭangin thlawpna ka hmu ṭha tawk loah ka inngai a ni. Chuvangin mawhphurhna ka kova innghat zawng zawngte chu FIFA roreltute kutah ka nghat ta a, president thar thlanna neih a nih hma chu ka office ka luah chhunzawm rih dawn a ni," tiin a lo puang tawh a, 'FIFA president aṭangin ka bang e' tih ṭawngkam a hman loh avangin a ban thu sawi lo angin tun hnaiah a thu hi a zuk leh a ni.

Blatter hian tun hmain a thu a lo zuk fo tawh a, FIFA president dinhmun a chuh tawh loh tur thu pawh FIFA president thlanna neih tawhahte pawh lo sawi tawhin amah thlaktu tur hmu zo lo anga insawiin a chuh nawn leh tho a, FIFA president aṭanga a ban tur thu a sawi hnu pawh hian a thu a zuk ngun hle.

Kum 79-a upa Swiss pachal Blatter hian kar hmasa lawka FIFA president aṭanga a ban leh loh thu a sawi hma hian president thar thlanna neih a nih hunah hruaitu thar hmel an hmuh tur thu a sawi a, a hnu lawkah amah thlaktu tur a hmuh zawh loh chuan president hna hi a chuh ve leh tur thu a sawi leh lawi si. Tunah chuan Blatter-a thusawiah hian eng ber nge rin tur tih pawh hriatthiam a har tawh hle a ni.