Bayern nena inhnimhnai Costa

Shakhtar Donetsk midfielder Douglas Costa chuan Bayern Munich nen inremna an la siam loh thu sawiin, inbiakna erawh kalpui mek a nih thu a sawi.

Kum 24-a upa Bra­zilian midfielder hian Ukrainian Premier Lea­gue chhuahsana Bun­desliga lama khelh a tum nia sawi thuthang a tam hle a, hetiang thuthang karah hian Shakhtar coach Mircea Lucescu chuan Costa chu Allianz Arena-ah 'The new Arjen Robben' a nih theih thu a lo sawi ve mek bawk.

Kum ruk chhung Ukrai­nian Premier Lea­gue-a player langsar ber pawl ni reng thei Costa chuan, "Tun dinhmunah chuan engmah inremna a la awm lo. Ka club leh Bayern te hi an in dawr ngei a, Bayern hian lakluh ngei min duh tih loh chu thil dang hriat ka nei lo," a ti.

Brazil international mid­fielder chuan, "Tunah chuan Copa America vangin Chile-ah ka awm mek a, Chile ka chhuah­san ve leh ka agent ka bia ang. Bayern tana khelh châk lo tunge awm ang?" tiin German champion team chu zawm a châk thu a sawi.

Costa hian Copa Ame­rica quarterfinal-a Brazil an chak loh ṭum khan penalty a pet goal lo a, a penalty pet goal loh vang hian Paraguay chu hneh loin Copa America aṭangin Brazil an tla a ni.