Dhoni leh Kohli an ko lo

Bangladesh hmaa an mualpho hnuin India Cricket team-in Zimbabwe an pan leh dawn a, player thlan­chhuah zingah captain MS Dhoni leh Virat Kohli te an tel lo.

Middle order batsman Ajinkya Rahane chu India captain a ni ang.

Thawhṭanni a BCCI selector ṭhu­khawm chuan Dhoni leh Kohli te hi chawlh an mamawh vanga chawlh hahdamtir niin an insawi a, anni pahnih bakah hian Suresh Raina, Rohit Sharma, Shikhar Dhawan leh Umesh Yadav te chu chawlh hahdam tir an ni. Ravindra Jadeja chu tun hnaia a chet chhiat theih em avangin India team aṭang hian paih a ni thung.

Senior player eng­emawzat chawlh hah­damtir an nih laiin hun rei tak chhung India tana koh tawh loh spinner Harbhajan Singh leh batsman Robin Uthappa te chu India squad-ah koh let an ni. Harbhajan hian kum li chhung chu India senior team tan a hmel a lan tawh lo a ni.

India leh Zimbabwe te hian July 10 aṭanga ṭan turin ODI match vawi thum an khel anga, Twenty20 match vawi hnih an khel bawk ang.

ODI squad: Ajinkya Rahane (capt), M Vijay, Ambati Rayudu, Manoj Tiwary, Kedar Jadhav, Robin Uthappa, Manish Pandey, Harbhajan Singh, Axar Patel, Karn Sharma, Dhawal Kulkarni, Stuart Binny, Bhuvneshwar Kumar, Mohit Sharma, Sandeep Sharma