Neville-a'n Valencia a pan
Spanish club Valencia chuan England defender hlui Phil Neville chu an assistant coach atan an lakluh thu an puang. Head caoch Nuno Espirito Santo thachhawng dawltu ah a ṭang dawn a ni.
Valencia lam hian Neville an lakluh thu puang mah se English defender ṭhin hian inbiakna an kalpui mek chauh thu leh tih fel tur tam tak an la neih thu a sawi thung.
Manchester United defender hlui hian kum 1995-2005 inkar kha United tan a khel a, hemi hnu hian Everton a pan. Everton manger David Moyes nen an inkawp rem hle. Kum 2013 khan football khelh a chawlhsan a ni.
Sir Alex Ferguson thlak tur a Moyes an lakluh khan Neville hian Old Trafford-ah a pu hlui hi coaching staff turin a zui lut ve nghe nghe. Mahse tunah chuan anni pahnih hian Spain-ah club hran ve ve an enkawl dawn tak avangin an inbeih a ṭul tawh ang. Tunah hian Moyes-a'n Real Sociedad a enkawl mek.
Kum 38-a upa Neville hian season tawp ruala Mestalla chhuahsan tu Ian Cathro hmunruak a luah zui ang. Cathro hi Premier League club Newcastle United manger Steve McClaren thachhangdawltu tur a ni.
Manchester United-a a khelh laiin Neville hian Premier League nomawi paruk, UEFA Champions League leh FA Cup pathum a chawi hman a ni.
A nau thar tur chungchang sawiin Valencia boss Nuno chuan, "Player a nih laia tawnhriat ngah leh mi fing a ni a, kan team tan hian a tawnhriat neih tawhte a ṭangkai hle ang. Ani ka tawhpui thei tur hi ka lawm hle," tiin a sawi.
England tan pawha vawi 59 lai lo inlan tawh defender hi tunah chuan Spain-ah chona thar hmachhawn turin a kal dawn ta a ni. Valencia hi season hmasa khan La Liga-ah palina niin season thar atan Champions League qualifying an khel ang.