MotoGP Rossi-a'n a hmahruaina sawh nghet

Valentino Rossi chuan MotoGP World rider championship-a a hmahruaina sawh nghet turin Inrinni khan Netherlands Grand Prix-ah hnehna a chang. Kum 36-a upa rider hian bike intlansiakah vawi 111 hnehna a channa chiah a ni nghe nghe.

Netherlands hmarlam rama Assen tlankawngah hian Rossi-a'n vawi sarih hnehna a channa chiah a ni. A zawna intlansiak pali a hnehna chang zawn thei Yamaha rider tho Jorge Lorenzo aiin point 10-in hma a hruai fal leh ta. Assen-ah hian Lorenzo hian second 13 ngawtin Rossi hi a phak lo a ni.

World champion ni lai Marc Marquez chuan nikuma a lo hman tawh Honda RC213V chassis a hmang leh a, hnehna chang zo chiah lo mah se pahnihna dinhmun a luah thei a ni.

Dutch Grand Prix-ah hian Italian rider Rossi hian bul ṭan ṭha in hun reitak chhung chu hmahruaitu ni mah se lap sarih tlan tur ala awm tihin Marquez chuan a rawn tlan pel. Repsol Honda rider hian hnehna a chang ngei dawnin a lang hman. Amaherawhchu kawng kawi hnuhnung berah Rossi-a'n a thiam thil rawn lantirin Marc-a tlan pelin hnehna a chang ta a ni.

Tun season-a hnehna vawi thum chang tawh Rossi chuan, "Pole position aṭangin intlansiak bul ṭan mah ila Marc kha a tlan chak em avangin engtik lai mahin ka inthlahdah thei lo. Kawng kawi hnuhnung berah khan Marc kha ropui takin rawn tlan mah se ka vanneih a siamin a tawpah hnehna ka chang hram a ni," tiin a sawi.

Kum 22-a upa Marquez chuan, "Kei leh ka team tan chuan tunkar chu a hlimawm hle mai. Podium lawn tur hian ka bei nasa thawhkhat hle a, tunah chuan a takin ka lawn leh ta. Inrintawkna min siam sak avangin tunah chuan phur takin intlansiak lo awm leh tur pawh ka hmachhawn thei tawh ang," a ti.