Mizoram Hexa League buatsaih a ni dawn

Zonet Cable Network leh Mizoram Football Association ten hlawhtling takin Mizoram Premier League an buatsaih a, kumin hian season lina khelh a ni dawn. Kumin vek khan Zonet leh Mizoram Basketball Association te buatsaih Mizo­ram Super League season khatna chu hlawhtling taka khelh zawh a ni bawk.

Nimin khan Zonet Studio-ah Mizoram Table Tennis Association (MTTA) leh Zonet Cable Network-te chuan thawhhona thuthlung an ziak fel a, Mizoram-a table tennis inelna ropui leh lawmman tamna ber tur Mizoram Hexa League (MHL) buatsaih a ni dawn.

Inremna chu

Inremna ang chuan Mizo­ram Hexa League hi MTTA-in a buatsaih ang a, Live broadcast tura hmanraw ṭul angte an tum ang. Zonet hian inkhel zawng zawng Live-in a tichhuak vek ang a, inkhel zawng zawng hi a tukah record tihchhuah leh vek a ni bawk ang.

Inremna thuthlungah hian MTTA aiawhin president C. Hmingthanzama leh Zonet managing director R.K. Lian­zuala ten hming an ziak a, hriatpuitu atan United Sports Association of Mizoram (USAM) treasurer Lalfakzuala Hmar leh Zonet general manager LV Lalthantluanga ten hming an ziak ve bawk.

Khelh dan hmang

MHL hi table tennis game tih lar nan leh tih hmasawn nana buatsaih tur a ni a, September leh October, 2015 chhung hian Mizoram Table Tennis Hall, Mission Veng-ah khelh a ni ang.

Inelnaah hian team paruk an awm ang a, team tinah hian player paruk zel an awm bawk ang. Ruahman lawk ang chuan Thawhlehni zan leh Ningani zan apiangin inkhelh thin tur a ni.

He tournament khel tur hian MTTA chuan Mens, Youth Boys leh Men's 35+ Category aṭangin rank sang mi 30 a thlang chhuak phawt a, anni bakah hian he tournament-a tel thei zawnna qualifying a buatsaih paltlang player parukte nen player 36-in MHL hi an khel dawn a ni.

Player zingah hian India sub-junior no 1 lo ni ṭhin David Zodinpuia te, national level-a Mizoram hming lo tiṭha tawhtute - Isaac C. Lalsawm­liana, Lalmalsawma te, Mizo zinga India Cup lo khel tawh leh awmchhun Lalremruata Ralte te, National Games-a Mizoram aiawhtute pawh an tel kim hle ang.

Mizoram Hexa League-a tel tur team-te hi organising board-in a rualkhai thei ang berin a remkhawm tawh a, team tinte hi inkhel tawk tak tura ngaih an ni.

Inelna chhim tur

MHL chhim tur hian Lalrin­puia bakah India Cadet a no. 1 leh 2 ni lai, Jeho Him­nakulh­puingheta leh Alberto L.R. Ruata te bakah India top ranked player-te sawm tum an ni.

Rinpuia hi India ram pum huapa hming lang pha a ni a (men's senior rank no. 8 leh Youth no. 4), ani hian South Asian Federation Cup khelh zawh taka gold pahnih leh silver pakhat a dawng.

Mizoram Hexa League hi Table Tennis Federation of India (TTFI) hriatpuinaa siam tur a nih avangin official-te pawh lo tel ngei tura ngaih an ni a, hemi bakah hian North East State-a Association-te pawh chhim tura sawm an ni ang.

MTTA thukhawchang

MTTA honorary secretary Basanta Meisnam chuan, "Kumin khan Jaipur-ah Annual General Body Meeting neih a ni a. Chumi ṭuma kan thurel chu nakkuma Indian top 19 leh World ranking top 19 te inelna tur Indian Super League a ni a, he inlena hi 11 Sports Media sponsor tur a ni. MHL hi Indian Super League kal dan zul zuia siam a ni," tiin a sawi.

Basanta chuan sawi chhun­zawmin, "Tun dinhmuna a lan dan chuan Mizo zingah Rinpuia hi tel ngei tura ngaih a ni a, Mizo dang tan pawh beisei theih a ni. Ranking hi a la danglam thei a, Mizote'n MHL hmang ṭangkaiin India rama player ṭha zawk kan la phochhuak thei a. ISL-a hian Mizo player pakhat aia tam tel tir hi kan tum a ni," tiin MHL-in Mizorama table tennis hmel a tih danglam theih thu a sawi.