BCCI member nih tum Cricket Association of Mizoram

Cricket Association of Mi­zo­ram chuan India rama cricket thuneitu sang ber BCCI-ah mem­ber nih tumin dilna an thehlut a, BCCI president Jagmohan Dalmiya chuan CAM dilna hi affiliation committee-ah lo ngaihtuah sak turin a hriattir.

Affiliation committe hian Mizoram dilna hi an pawm a nih chuan September thlaa Annual General Meeting-ah ngaihtuah turin an thehlut leh anga, BCCI khawmpui lian bera member kalkhawm hmun lia ṭhena hmun thumin an pawm chuan CAM hi BCCI hnuaiah member an ni thei dawn a ni.

Member nih hlawkna

India ram state puitling zinga BCCI member ni lo awmchhun Mizoram dilna hi pawm a nih chuan Mizoram cricket-in hma a sawn phah hle tura ngaih a ni a, kum tin BCCI aṭangin cheng nuai 50 thleng ṭanpuina an dawng ṭhin dawn a ni.

Hei aia Mizoram cricket-in a hlawkpui theih zawk tur chu cricket lama mithiamte thurawn CAM in a dawng ṭhin tur hi a ni a, hmun leh hma ṭha zawk nei tura puih an ni anga, coaching lamah nasa taka puih an ni bawk ang.

Ṭanpuina sum dawnte hi mah­ni duhdana hman ral mai mai theih a ni dawn lo. Kumtin sum hman dan hi July 31 apiangin BCCI-ah an thehlut anga, sum hman danah felhlel a awm nia BCCI lamin an hriat chuan ṭanpuina hi tihtawp theih a ni.

A khaipadiat

BCCI-a affiliate member an tihte hi BCCI hnuaia member zingah an dinhmun a hniam ber a, a bul ṭanna a ni. An chung chiahah hian associate member an awm.

Affiliate member kum nga an nih hnuah associate member ni turin an dil leh thei a, associate member an tih chungah hian full member an awm leh a, full member hi a sang ber a ni.

BCCI hnuai a affiliate mem­ber dinhmun hi a la sang rih lo hle a, BCCI tournament age level-ah inlan thei mah se senior level-ah an inlan thei lo thung.

Associate member-te hi Chhat­tis­garh State Cricket Sangh, Sikkim Cricket Association, Manipur Cricket Association leh Bihar Cricket Association te an ni a, Meghalaya, Nagaland leh Arunachal Pradesh te chu hmarchhak state zinga affiliate member an ni.

BCCI-ah hian full member 30 awm mekin hmarchhak state zingah Tripura leh Assam te chu full member ni thei state an ni.

State leh UT hrang hrang cricket association te hian BCCI hnuaia an member nihna dinhmun a zirin ṭanpuina sum leh pai bakah thil dang dangah hamṭhatna an dawng a ni.

Mizoram cricket tan hmasawnna

Cricket Association of Mi­zoram dilna ang hian Mizo­ram hi BCCI hnuaiah affiliate member anga pawm an ni lo a nih pawn hamṭhatna tam tak an dawng dawn tho.

Kum 2003-a BCCI president a nih hmasak ṭum a Jagmohan Dalmiya-a'n a lo ruahman tawh cricket lama hnufual state te'n hma an sawn theihna tura ruahmanna New Area Development Committee chu tun hnaiah tih nun thar leh a ni.

New Area Development Committee hian a bik takin hmarchhak state-te a thlur bing dawn a, heng state-te hi turf wicket tam zawk ruahman sak an ni anga, coaching programme kalpui a ni bawk ang.

Hei mai hi a la ni lo, cricket khelhna ground pangngai tak ruahman sakte leh indoor coaching facility heng state tin te hnena pek a tel a, heng zawng zawng ringawt pawh hi Mizoram cricket tan chuan hmasawn pui tham a ni.

Ngaihthah hlawh Mizoram

Mizoram hian kum hnih liam tawhah khan BCCI member nih duhin dilna an lo thehlut tawh a, a thuphunga pawm sak an nih hnuah affiliation committee-in a la ngaihtuah leh lo.

March 2, 2015-ah a vawi hnih nan Dalmiya chu BCCI president turin lakluh a ni a, cricket lama state hnufual zawk­te ngaihtuahtu Dalmiya hian Mizoram dilna hi ngaihtuah turin a ti leh ta a ni.

Beiseina nen CAM

Cricket Association of Mizo­ram a an assistant secretary B. Lalnuntluanga (Valpuia) chuan, "Kum sawm dawn BCCI hnuaia affiliate member ni tur hian kan lo bei tawh a, BCCI lam hi president inthlak ruala thil inthlak danglam zung zung ṭhin a nih avangin kan beisei angin thil a kal lo ṭhin. Tun ṭumah erawh kan beiseina a sang hle a, kan dilna hi a hlawhtlin ngei kan beisei," tiin beisei an neih san thu Vanglaini palai a hrilh.

Valpuia chuan Mizoram chief minister leh CAM president ni bawk Lal Thanhawla hmalakna fakin, "Kan dilna ngaihtuah a ni tur hrim hrim hi kan lawm a, hmasawnna chi khatah kan ngai a ni. Kan hmalakna kawngah kan president Pu Hawla'n a thawkrim hle a, mimal tak pawha BCCI president Dalmiya nen inhmelhriat an nih avangin hmalak a awlsam phah a ni," a ti.

Hetihlai hian CAM president Hawla chuan an dilnate a ngaih­pawimawh sak avangin Dalmiya hnenah lawmthu a sawi a ni.