Real chunga awm reng tur chuan inlei belh zel a ngai - Bartomeu
Barcelona president Josep Maria Bartomeu chuan an hmelma kumhlun Real Madrid chunga awm reng tur chuan player ṭha lei thar zel an mamawh thu a sawi.
Season hman zawh taka treble champion Barcelona hian tun season transfer-ah Sevilla aṭangin Aleix Vidal chiah Nou Camp-ah an la seng lut rih a, Spanish right back hi Barca transfer thubuai vangin nakkum January hma chu an la chhawr thei dawn lo zui.
July 18-a Barcelona president thar tur thlanna a Barca president hlui Joan Laporta nena inkhing tur Bartomeu chuan, "Tunah hian chawl mai thei kan ni lo, kan chawl a nih hlauh chuan a bik takin Real Madrid-te hian an chhawr dawn lutuk a ni. Transfer market-ah an ni hi chuan player ṭha tak tak leiin an mamawh lohte an chhuah tir a, an thawkrim em em a ni," a ti.
Bartomeu chuan sawi chhunzawmin, "Club executive board hian club hmasawnna tur kan ngaihtuah a ngai a, season thara team hlauhawm leh ṭha zawk din thei tura kan ṭan a ngai a ni," tiin season hman zawh taka La Liga, Copa Del Rey leh Champions League nomawi chawitu Barca team a la duh khawp lo.
Hetihlai hian Bartomeu khingpui tur Laporta chuan Barcelona president-a thlan tlin a nih phawt chuan Juventus midfielder Paul Pogba chu Nou Camp lamah a sengluh tur thu a lo sawi ve mek bawk.