Rio Olympic 2016 a herliam ta
"Mikhual intawk khawm kha Brazil kan chhuahsan dawn chuan ṭhianṭha kan ni tawh, hei hi Olympic-in a tum pawimawh tak pakhat chu a ni," tiin International Olympic Committee (IOC) chief Thomas Bach chuan Rio Olympic 2016 kharnaah a sawi. Khawvela infiammite intawhkhawmna lian leh ropui berah hian gold 46 latu United States chu pakhatna an ni.
Maracana Stadium-ah ram hrang hrang 206 leh refugee team aṭanga infiammi 11,303 kalkhawmte chuan nimin zing khan in mangṭhana hun an hmang a, infiammi tam takten 2020 Tokyo-a inhmuh leh an beisei laiin ṭhenkhat tan erawh an hun hnuhnung ber a ni thung. Kharna hunah hian stadium chhunga ṭhutna awm 78,838 chu a khat hneh hle a, khawvel hmun hrang hrang aṭangin mi tluklehdingawn chuangin TV aṭangin an thlir bawk.
IOC president Thomas Bach chuan, "Khawpui mak leh dangdai takin Olympic danglam tak a thleng a, ni 16 chhunga Brazil ram ṭanrualna khan khawvel a hneh a ni, hun harsa tak hmachhawn tur chuan thawhhona ṭha a ngai a, chu chu a takin kan hmu," a ti.
Bach hian Olympic chan-china a vawi khat nana ral-tlan (refugee team) Olympic-a inlante chuan khawvel hmun hrang hranga harsatna vanga mahni inlum luah thei lote tan beiseina leh chona an siamsak ngei a beisei thu a sawi tel bawk.
Kharna inkhawmah hian khawvel boruak lum zel tih-zia-awm theih dan tur leh a ven dan tur tihlan a ni. Rio OIympic meipui chheh chu stadium chung aṭanga ruah sur hmanga nan mih tir a ni a, stadium chhungah thingkung lem ṭo tir niin hei hian boruak lum leh chhe zel tur ven nana thing phun a pawimawh zia a lan tir bawk.
South America khawmual-puia Olympic nghah hmasa ber hi a thlengtu Brazil tualchhung buaina vang te, politics, ei leh bar, inbuatsaihna ṭha tawk lo, hmunhma zawh fel hman loh leh hrileng Zika vangin neih
ṭan a nih hma khan sawisel tawk nasa hle mah se he Olympic vawi 31-na hi khaw--velin a hre reng tawh dawn a, duhthusam loh lai awm bawk mah se a pumpui thlir chuan a hlawhtling hle a ni.
Rio 2016 organising com-mittee president Carlos Arthur Nuzman chuan, "Rio Olympic hi kan tan chuan chona hautak a ni a, kan hlen-chhuak a - kan hlawhtling. Kan khawpui leh ram mipui he infiamna khawmpui lian a hlawhtlin theih nana thawktute hi ka chhuang a, hnuhma ropui kan siamin kan hnutchhiah a ni," tiin a sawi ve bawk.
Pakhatna US
Rio-ah hian United States chuan infiammi 554 a tir a, anni aia tir hnem an awm lo. A thlengtu Brazil (465), China 413) leh Great Britain (366) ten an dawt. US infiammite hian gold 46 bakah silver 37 leh bronze 38 lain an chungnung fal hle a, anmahni hnaih bertu Britain chuan gold 27 lain pathumna chu China an ni. Olympic neih ṭan hmain Russia sorkar chu hmingchhe hle mah se IOC dan leh hrai zawm famkim thei athlete 282 zet an inlan tho a, gold 19 lain a pumpuiah palina an ni phak.
Vawi khatna
Rio Olympic Games-ah hian Fiji, Jordan leh Kosovo te hian an ram chanchina a vawi khat nan gold an la - Fiji hi kumin aṭanga telh thar Olympic rugby sevens champion an ni. Bahrain, Puerto Rico, Singapore, Vietnam leh Tajikistan te chuan an ram chanchina medal hmasa ber an hawn bawk. Tun ṭumah hian archery, athletics, modern pentathlon, track cycling, shooting, swimming leh weightlifting-ah te world record 27 siam a ni.
Thlirna Tawi
2016 Summer Olympics
Thlengtu Rio de Janeiro, Brazil
Motto A new world
Ram inlan zat 207
Infiammi kal zat 11,303
Inelna chi hrang 306