Basketball champion US

United States chuan 96-66 a Serbia hnehin Rio Olympic 2016 mipa basketball champion an ni. Pathumna zawnnaah Olympic hnuhnung pahniha silver medallist Spain chuan Australia lakah 89-88 a hnehna changin bronze medal an dawng bawk.

Final inkhelah US hian inkhel an thunun hneh hle a, half time-ah 52-29 a hma hruaiin hun tawp thlengin dinhmun hlauh thawnawmah an ding lo. US tan 2012 London-a gold medal latu zinga lo tel tawh Kevin Durrant chuan point 30 zet score-in a thawhhlawk hle. Ani bakah hian DeMarcus Cousins chuan point 13 a score bakah re-bounds vawi 15 a la - Golden State Warriors star player Klay Thomp-son chuan point 12 a nei ve bawk.

Kum 1992 khan US hian Croatia chu 117-85 in an lo sawp tawh a, hehmi hnuah tun ṭum hi Olympic basketball final-a insawp lehna nasa ber a ni hial. US tlangvalte hian Olympic basketball hi an awp a ni deuh ber a, vawi 19 an inlan tawhah ṭum 15 zet an champion thei a, tunah hian hneh loh nei loin match 25 chhung zet an kaltluang tawh a ni.

US coach Mike Krzyzewski hian Olympic hnuhnung pathumah a team a champion pui thei a, ani chiah hi hetiang dinhmun luah thei an la awm. Kum 69-a upa Krzyzewski Olympic zawh rual hian a hna aṭangin a chawl tawh dawn a, a hmun ruak luahkhat turin Gregg Popovich a chiang tawh.

Kevin Durant chua, "Gold medal awrh chung ngeia kan rama haw leh kha kan duhthusam a ni a, tunah chuan a takin a thleng ta. Player ṭha leh ropui tak takte nen kan thawkho a, Rio-ah hun nuam leh hlimawm tak kan hman kha theihnghilh theih a ni tawh lo ang. Coach thlah nan chuan hetiang baka hun ṭha leh duhawm hi a awm chuang bik lo," tiin a sawi.