India tan Sindhu Silver leh Sakshi Bronze

Rio Olympic neih zawh takah Pusarla Venkata Sindhu leh Sakshi Malik te chuan India tan silver leh bronze medal an dawng a, kum 1992 Barcelona Olympic hnuah India hian khawvela infiamna khawmpui lian berah hian kut benga haw tawp a nei ta bik lo - kuminah hian ram 207 inlan zingah 67-na an ni.

Indian Olympic Association chuan kuminah hian infiamna chi hrang 15 a inlan turin infiammi 121 zet chu Brazil-ah a tir liam. 1920 hnulamah India hian Olympic-ah inlan loh a nei lo a, kumin hi athlete a tirh hnem ber ṭum a ni a, 2012 London Olympic ai khan 34 zetin a tir tam zawk a ni.

India tan Olympic a mimal gold medal la thei hmasa ber Abhinav Bindra chuan Opening function-ah India flag a rawn keng lut - Punjab tlangval hi 10m air rifle inkah siakah point 163.8 hmuin palina a ni. Nimin zinga Olympic kharna hun hman a nih chuan Rio-a India tana medal la hmasatu Sakshi Malik-i'n hnam puanzar a keng tawh thung a ni.

Silver

India-in badminton inelnaa tel turin shuttler pasarih a tir a, an zinga pahnih Saina Nehwal leh Sindhu te chu hmeichhe single-ah an inlan. 2012 London bronze medallist Saina hian knock out round lut lo mah se India hmeichhe zinga Olympic silver medal dawng thei hmasa ber ni turin Sinshu-i'n final a lut thung.

Kum 21-a upa Sindhu hian final-ah world number 1 Carolina Marin chu 21-19, 12-21, 15-21 in hneh lo mah se a ropuina sawi nep chi a ni lo. Hyderabadi badminton star hian final lut turin world number 2 Wang Yihan (quarterfinal) leh number 6 Nozomi Okuhara (semifinal) te a hneh a ni.

Bronze

Rio-ah ni 11 chhung zet India chu medal la loa a hawi hil hnuah Haryana wrestler Sakshi Malik chuan hmeichhe wrestling freestyle 58kg category-ah bronze medal a dawng.

Kum 23-a upa Sakshi hian bronze medal inchuhnaah Kyrgyzstan wrestler Aisuluu Tynybekova chu a tir lamah 5-0 ngawtin hneh lo zawk mah se hun a tawp meuh chuan 8-5 in a lehthal a, wrestling inelna bikah India hmeichhe zinga Olympic medal la thei hmasa ber a ni.

0.15 chiah...

Tripura tleirawl Dipa Kar-makar chu India hmeichhe zinga Olympic gymnastic final round lut thei hmasa ber a ni a, medal a lak lohna chu point 0.15 chiah a ni. Kum 23-a upa Karmakar hian Vault-ah point 15.006 hmuin palina a ni a, pathumna Switzerland star Giulia Steingruber (15.216) nen an inthlau lo hle a ni. Karmakar hian nikum National Games, Kerala a neihah khan gold medal panga a lo la tawh.