Phelps leh Bolt an liam ang maw...

Michael Phelps leh Usain Bolt te hi infiamna huangkhata awm ni lo mah se inanna an neih chu an hma zawnah chuan khawvela ṭha ber an nihna hi a ni. Khawvela athlete ropui ber pahnih tan Rio hi an Olympic hnuhnung ber a ni ta - 2020 Tokyo-ah an hmel kan hmu a nih chuan inelna huangah a ni tawh lo ang.

American swimmer Phelps hian Olympic medal 28 teh meuh mai a awrh tawh a, heng zianga 23 chu gold niin mimala inelnaa a dawn chu 13 a ni; heng a sulhnute hi tumahin an tluk lo a, khum theih loh chu ni lo mah se lehthal tur erawh chuan midanglam bik an rawn pian chhuah ngei a ngai ang.

Kum 31-a upa Phelps hian 2012 London zawh hnu khan tuihleuh a chawlhsan a, kum 2014 khan infiamna huangah lo kir lehin Rio-ah bik hian gold panga leh silver pakhat a dawngin an ram chu a chungnung berah a awmpui.

Jamaican sprinter ropui Bolt chuan, "Khawvela a ṭha berte zingah ka tel ta," tiin a sawi. He a thusawi hi kan pawmpui thei lo a nih chuan a sulhnu en ila kan ngaihdan kan sawh sawn mai thei.

Pathiannia kum 30 tling hlim Bolt hian Olympic vawi thum (2008 Beijing, 2012 London leh 2016 Rio)-ah te khan 100m, 200m leh 4x100m relay-ah te gold a dawng. Ani chiah hi track and field bikah athlete zinga inelna ngai pathuma ṭum thum a zawna champion thei a ni. 100m leh 200m world record siamtu Bolt hi Olympic-ah inlan tum tawh lo mah se 2017 World Championship-ah erawh a la inlan dawn thung.

Phelps leh Bolt te hi infiammi ṭha chungchuang bik an ni a, Olympic awm chhung chuan an chanchin hi sawi zui a ni tawh ang - a ṭha bikte vanglai en theia kan awm hi kan vannei.