Real chak zanah Atletico chak zo lo

Zinedine Zidane-a enkawl Real Madrid chuan tun season La Liga-a an match hmasa berah Pathianni zan khan Real Sociedad chu 3-0 in an sawp nghal a, an elpui Atletico Madrid erawh kaithar Alaves nen 1-1 in an inhnehtawk.

Euro 2016 khelh zawh taka semifinal thleng Wales hruaitu Gareth Bale-a'n a chet ṭhat a chhunzawm zel a, Real tan goal hnih a khung. Marco Asensio chuan Spanish club lian tana a league match hmasa berah goal a khung nghal bawk.

Real tan Bale

Hliam vangin Cristiano Ronaldo leh Karim Benzema ten tun season-a Real league match hmasa ber khel thei lo mah se Bale-a'n a mawhphurhna zo takin a hlen. Welsh forward hian inkhelh ṭan aṭanga minute 2-na lekah goal hmahruai a tauh lut nghal a, mual neitu Sociedad fan-te an hawihai hle.

Minute 40-na a ni a, Real rawlthar duhawm Asensio inlar hun a ni. Kum 20 leka upa midfielder hian Real tana a match hnihnaa a goal hnihna turin mawi takin a chip lut a, Sociedad keeper Geronimo Rulli-a'n tih theih a nei lo.

Hun pek belh a ni a, 2-0 in Real an chak tawh mai dawna a lan hnuah Bale bawk a inlar leh a, kum 27-a upa winger hian Sociedad keeper Geronimo Rulli a tlan hel hnuah Real goal thumna a khung. Hun a tawp zui a, an season bul ṭan danah Real an lawm khawp ang.

Nghilh har Atkinson

Karhmasa lawk khan Real Sociedad striker hlui Dalian Atkinson chu police nen an intawngna lamah chesualin a thi a, Spanish club fan-te hian La Liga match 29-a inlana goal 12 khungsaktu striker hriatrengna hun hi an hmang.

Aston Villa tan a khelh laia hriat hlawh striker hian La Liga club tan a khelh laiin jersey no. 9 a ha ṭhin a, Sociedad fan-te hian an striker hlui hi an theihnghilh lo tih pholan nan minute 9-naah kut an beng a, minute 9 chhung an chawl lo.

Zidane a lawm

Real Madrid coach Zinedine Zidane chuan, "Kan bul ṭan dan a duhawm a, hma taka goal kan khung avangin kan tan chuan engkim kha a awlsam tawh a ni. Sociedad khelmual hi inkhelh harna hmun a ni a, kan chance neih kan chhawr loh chuan kan talbuai dawn tih ka hria. Mahse, goal thum khunga kan chhuah ve miah loh avangin kan khel ṭha takzet a ni," tiin a naute khelh danah a lawm hle.

Zidane chuan team ṭha tak a enkawl vanga player thlan a harsat thu sawi nghalin, "Khelmuala inlan nghal tur player 11 thlan hi ka tan chuan a harsa a, mah se thutlukna ka siam ngei a ṭul ṭhin si a, a chang chuan ka ngaihtuah nasa lutuk hi ka lu hi a na ṭhin hialin ka hria," a ti!

Atletico an tawlh thlu

An elpui Barcelona leh Real Madrid-in an match hmasa bera hneh^-na an chan nghal laiin Atle-tico Madrid erawhin chak result an hlawh chhuak zo lo a, kaithar Alaves nen 1-1 a in-hneh-tawkin point khat an insem.

Minute 90+3 ah Kevin Ga-meiro chuan Fernando Torres penalty hlawhchhuah a pet goal a, point thum hlawh chhuak tura ngaih an ni. Mahse, Alaves an zam mai lo a, minute 90+5 ah Manu Garcia goal ropui hmangin an si phurh an sut. Atletico tan goal dang khungna hun a awm tawh lo a, point khata an lungawi a ṭul.

Atletico an vanduai tih loh rual a ni lo a, striker thar Kevin Gameiro-a finishing tawih lo chu hmuh hmaih luih theih a ni lo bawk. French striker hian Atletico hun ṭha neih vawi tam a khawhral a, Yannick Carrasco chuan post pet perin susbsitute khel ṭha Fernando Torres chuan woodwork a pet per ve bawk.

Simeone a lawm lo

Atletico Madrid coach Die-go Simeone chuan, "Hneh-na chan ngei tumin kan theihna zawng zawng kan pe a, hnehna chang tur kan ni. Ka naute pawn chak ngei duhin an khel a, a hmawr kan bawk ṭha tawk ṭhin lo. Alaves lamin an goal venhim an ngaihtuah a, player inhliam an nei chungin theihtawp an chhuah a, an keeper khan a khel ṭha takzet bawk. Hei hi football chu a ni a, hnehna chang tur chuan goal kan khung a ngai si a ni. Engtiklai mahin point khatah ka lungawi ngai lo," tiin a sawi.