Cincinnati Masters champion Cilic

Marin Cilic chuan Andy Murray lakah 6-4, 7-5 a hnehna changin Cincinnati Masters champion a ni. Hmei^-chhe inelna lamah Karolina Plis-kova chuan Angelique Kerber hnehin champion nomawi a chawi ve bawk.

Mipa final-ah world number 2 Murray a khel ṭha tawk lo a, chutih-rualin 2014 US Open champion Cilic-a'n champion phu khawpin a khel ṭha - darkar khat leh minute 34 an inbeih chhungin Cilic a chungnung zawk.

Kum 29-a upa Murray-a'n match 22 chhung zet hneh loh nei loa a kaltluang chu a tawp rih ta a, hetihlai hian Cilic erawhin kumina Grand Slam hnuhnung ber tur US Open atan beiseina a neih san phah hle ang.

Hmeichhe inelna lamah world number 1 Serena Williams a inlan loh avangin number 2 Kerber hi champion ni sela chuan WTA number 1 thar kan hmu ang. Mahse, German nula hi final-ah kum 24-a upa Pliskova chuan ṭum nga ngawt a service chhuhsakin 6-3, 6-1 in a tlawm a - a hun ṭha neih a chhawr ṭangkai thei ta lo a ni.

Rio Olympic silver medalist Kerber chuan, "Kuminah kum ṭha tak ka hmang a, engtik niah emaw chuan number 1 nih hun chu a rawn inherchhuak mai ang, boruak rit tak ka insiam chawp tur a ni lo," tiin German hmeichhe zinga Steffi Graf hnua number 1 ni leh thei hmasa ber nih a inbeisei thu a sawi.