London Stadium-ah Hammers chak nghal Relegation Battle hmachhawn turin inpeih rawh u - Moyes

West Ham-in Pathianni zan khan London Stadium-ah Premier League-a an match hmasa ber an khel a, Michail Antonio goal hmangin AFC Bournemouth an hneh. Inkhel dangah kai thar Middlesbrough-in Cristhian Stuani goal hnih hmangin Stadium of Light-ah Sunderland 2-1 in an hneh ve bawk.

Entu tam?

West Ham-in an mual tharah entu 56,977 an nei nghal a, club record ni mah se 60,000 zet lenna stadium-ah ṭhutna awl hmuh tur a awm nual. Hammers hian kum 100 chuang an khelh tawhna Upton Park aṭangin London Stadium-ah an insuan lut a, mipui ṭhutna leh inkhelhna mual a in hlat hret avangin thawm a ring tawk lo.

Bournemouth ṭantute chuan elh sen takin 'Hei hi Emirates Stadium a mi?' tiin Arsenal hmer tel ranin an au rual a, Hammers
ṭantute an stadium thar an tlangnel tawk lo mah se team erawhin hnehna an chang nghal thung.

Goal 1 a tawk

West Ham-in an match hnu­hnung berah Chelsea chu hun tawp dawna goal an chhuah vangin an hneh lo a, Europa League Playoff-ah lah hun tawp dawna goal an chhuah avangin Romanian club Astra Giurgiu an draw bawk. Pathianni zanah erawh Hammers-in minute 85-naah goal an khung thung a, Gokhan Tore cross chu Michail Antonio-a'n a tauh lut.

Hammers hian inkhel an thunun bik lo a, West Ham keeper Adrian-a'n Cherries forward Joshua King goal khung tur a dan bakah Jordan Ibe-a'n chance ṭha a hlah bawk. Slaven Bilic hoten goal an khung hma hian Bournemouth player Harry Arter chu hnawhchhuah a ni a, Hammers-in player 10-a khel Cherries lakah hnena an chang.

West Ham boss Slaven Bilic chuan, "Inkhelh ṭantirh minute 15 chhung kha chu keini aiin an khel ṭha zawk a, mah se goal an khung lo. Second half-ah erawh chak kan duh zawk a, stadium thara goal kan chhuah loh leh kan chak avangin result lawmawm a ni," tiin chak an phu zawk thu a sawi.

Boro tan Negeredo

Premier League kai thar Mid­dlesbrough tan Cristhian Stuani-a'n first half-ah goal hnih a khung a, Spanish forward Alvaro Negredo siam sak ve ve a ni. Kum sarih leh a chanve hnua Wear-Tees derby second half-ah Sunderland an insiamṭha a, minute 71-naa Patrick van Aanholt goal belhna an neih theih loh avangin David Moyes-a hote match hnihah point an hmu lo.

Middlesbrough manager Aitor Karanka chuan, "Point hi a pawimawh ber a, derby-a chak phei chu a hlu lehzual. Kan player-te hi Premier League hmachhawn turin an inpeih tawh a ni," tiin a sawi.

Sunderland boss David Moyes chuan, "First half-ah khan 2-0 a hnufual zawk tur kan ni lo a, kan vanduai a ni. John O' Shea inhliam vangin kan buai a, chutihrualin second half-ah erawh goal khung tumin nawr viau mah ila kan khung thei tlat lo," tiin point hmuh an phu thu a sawi.

Match hniha point hmu lo Sunder­land manager David Moyes chuan, "Kum li chhung chu Sunderland hi tlak hlauhawmah an awm ṭhin a, tuna taka kan dang­lamna thut tur a awm lo. Mipui hian thilmak an beisei a ni thei a, amaherawhchu chutiang ngawta thlak theih a ni lo," tiin Sunderland ṭantute chu an dinhmun hre turin a fuih lawk.

Black Cats hi season li chhunga an dinhmun chu 17th, 14th, 16th leh 17th te a ni a, coach pawh an nei zing malh malh hle. Season nga chhunga an coach te chu Steve Bruce, Martin O'Neill, Paolo di Canio, Gus Poyet, Dick Advocaat leh Sam Allardyce te an ni a, David Moyes hnuaia result ṭha an nei lo a nih chuan Scottish manager hmalam hi a êng bik lo ang.