Milan chakna Bacca hattrick
AC Milan striker Carlos Bacca chuan Serie A-a an match hmasa berah goal thum khung nghalin hattrick a siam a, an mikhual Torino lakah 3-2 in hnehna an chang a ni. Milan tan Colombian striker hian minute 38-naah goal hmahruai a khung a, mikhual team tan Andrea Belotti-a'n a sut hnuah goal pangngai leh penalty hmanga goal hnih dang khung lehin hattrick a siam.
April thlaa Milan-in an ban an coach hlui Sinisa Mihajlovic-a enkawl Torino tan Daniele Baselli-a'n injury time-ah goal khat a khung a, 3-2 a ni. Mahse, hun pek belha Torino penalty hlawhchhuah erawh Milan keeper Gianluigi Donnarumma fakna mai a ni a, kum 17 leka upa keeper hian Torino-in point hlawhchhuah theihna hun ṭha an neih chu engmah lo maiah chantirin Andrea Belotti-a penalty pet chu a dan sak a ni.
Europe a kir tum
Nipui transfer bazar-ah West Ham leh Carlos Bacca sawizawm an ni a, mah se kum 29-a upa striker hian Italian club tana khelh chhunzawm a thlang.
Bacca chuan, "Hmun danga khel tura sawmna ka hmuh khan ka chhungte nen kan inrawn a, Milan-a cham chhunzawm zel hi ka thlang ta zawk a ni. Thutlukna dik tak ka siam a, Milan hi Europe-a hruai kir tura ka intiam avangin ka hna ka la thawk zo lo a ni," tiin Milan a chhuahsan loh chhan a sawi.
Torino coach Sinisa Mihajlovic-a'n Milan a enkawl laiin penalty dangtu keeper Gianluigi Donnarumma chu a match hmasa ber a khelhtir a, Serbian coach chuan, "Ka team penalty hlawhchhuah min la dan sak dawn tih hria ila chu a match hmasa ber kha ka khelhtir lo ang," tiin fiamthu a thawh.
Kum 47-a upa manager chuan sawi chhunzawmin, "Gianluigi khan penalty kha a dang ngei dawn tih ka hriat avangin pet a nih hma hauh khan ka lo nui ringawt a ni," tiin a keeper hlui chu a fak hle.
De Boer a tlawm nghal
Inter Milan-in coach Roberto Mancini an ban hnuah a aiawh turin Frank de Boer an lalut a, Dutch manager enkawlna hnuaia an match hmasa berah Chievo chu 2-0 in an hneh lo nghal. Chievo tan hian winger Valter Birsa chuan goal hnih a khung a ni.
Frank de Boer chuan, "Kan result avangin kan lawm lo a, hnathawh tur tam tak kan nei a ni. Kan khelh dan leh taksa lamah pawh hma kan sawn ang tih ka chiang a, match neih leh hunah chuan tun aia ṭha zawk hian khelh kan tum ang," tiin hmasawn an tum thu a sawi.