MFA Super Cup 5:00 PM BVT vs AFC 7:30 PM Chawnpui Vs Venghlui
Aizawl FC-in MFA Super Cup an la champion loh chhan chu nikuma Bethlehem Vengthlang FC an hneh loh vang a ni. Vawiin tlai dar 5:00 hian MPL club pahnih hi quarterfinal-ah an inhmachhawn dawn a, zanin dar 7:30-ah first division club pahnih Chawnpui FC leh Venghlui FC te an inkhel bawk ang.
Thawnthu hlui
Season liam ta khan K. Mal-sawmkima hnuaiah Aizawl FC-in BVT FC hnehin I Day Football nomawi an chawi a, MFA Super Cup-ah Spanish manager Manuel Retamero hnuaiah AFC-in BVT chu 2-1 in an hneh lo.
Tun ṭumah erawh MFA Super Cup kalphung thlak a ni tawh a, match khat lek a nih tawh loh avangin nomawi chawi turin MPL club tan pawh match li khelh a ngai. Aizawl FC-in quarterfinal thleng turin third division club Bungkawn FC 3-0 in an hneh hram a, BVT lamin Aizawl khaw pawn club awmchhun Tuidam FC 6-1 in an sawp thung.
MFA Super Cup bikah chuan BVT hi an la khel ṭha zawk a, amaherawhchu I Day Football khelh zawh takah AFC an champion laiin BVT erawhin hneh an nei lo.
Sa huai ser
Aizawl FC-in third division an hmachhawn ṭumin hming langsar player an awltir, vawiinah erawh Ghanaian forward Bright Middleton Mends, Albert Zo-hming-mawia leh Brandon VL Remdika te'n inkhel bul an ṭan tawh dawn.
AFC coach Mala chuan, "MFA Super Cup-ah hian kan la champion loh avangin nomawi chawi hi kan duh takzet a, chak loh nghal theih a nih avangin inenchhinna hun a ni lo. Kan ṭhat theih dan bera kan hriatin kan khel dawn," tiin Vanglaini palai a hrilh.
BVT player-te I Day Football aiin fitness-ah nasa takin hma an sawn a, first division club mahin MPL club an hneh thei a nih chuan Aizawl FC hi an hneh thei tur a ni. BVT coach Lalbiaksanga Colney chuan, "Kan khelh ṭhat chhawmnun zel kan duh a, player-te pawh Aizawl FC hmachhawn turin an inpeih," tiin an ṭhat dan bera an luh tur thu a sawi.
Floodlight hnuaiah
Zanin hi MPL club hneh thei Chawnpui FC leh Venghlui FC te inlan hun a ni a, player neih dana intluk tawk an nih avangin ṭantu ngah zawk dinhmun a ṭha ang.
Chawnpui FC-in Chanmari West an hneh ṭumin midfield laia Laldawngkima leh Lalchhuansanga te an khelṭha a, tlar hmaa awm Lalrinhlua leh H. Lalzawmliana ten an thlawp ṭha bawk. Chawnpui
ṭhatna hmun midfield lai hi Venghlui inchhuanna hmun tho a ni a, captain B. Lalhruaizela leh James Lalhmingsanga ten inkhel thunun tir bik an tum lo ang.
Defence lamah Lalthlamuana (Tamu-a) hoin Chawnpui FC-in Venghlui tlar hma Lalremruata, Francis Ramdinmawia leh K. Ro-luahpuia te goal khung tur dan an tum tur hi a hmuhnawm bawk ang.
Chawnpui manager Richard Lalduhsanga chuan, "Ramhlun North hneh thei team kan tum dawn a, chak chiangah kan inngai lo. Kan chakna chance hi 50% velah kan ngai a, Ramhlun North kha chu chak se chuan semifinal luhna chance hi a tlem sawt ang," tiin team ṭha zawk an nih bik loh thu a sawi.
Venghlui FC coach Lalmal-sawma chuan, "Chanmari West aia Chawnpui kan tum tur hi ka lawm khawp mai, anni aiin kan
ṭha zawkah kan inngai a, semifinal kan thlen theih kan beisei," tiin team ṭha zawk an nih thu a sawi.
Venghlui FC hi second division aṭanga first division kai chho hlim an ni a, first division-a awm sa Chawnpui FC nen hian an vawi khat inhmachhawnna tur a ni. Team enkawltute hian inkhel entute an neih ṭhat an beisei thu an sawi ve ve a, supporter nei ṭha zawk chu zanin hian Lammualah a hriat ang.