ISL match hmasa ber Guwahati-ah

Indian Super League season thumna opening ceremony October 1-a neih tur chu NorthEast United khelmual Indira Gandhi Athletic Stadium, Guwahati in a thleng dawn a, match hmasa berah NorthEast United leh Kerala Blasters an inhmachhawn ang.

ISL enkawltu Football Sports Develop-ment Limited (FSDL) chuan, "Tun hnaiah North East hian India football hmunpui ni tura theihna an neih san zia an pholang fo tawh a, FSDL chuan North East-in football-a hma a sawnzia kan hriatpuina tihlan nan Guwahati khawpuia ISL 2016 opening ceremony nghah hi kan ti tlu a ni," a ti.

NorthEast United neitu zinga mi John Abraham chuan, "Highlander-te tan hei hi thu lawmawm a ni a, kumina thil thleng lian bera kan inhmukhawm tur hi a lawmawm a ni. Kerala Blasters lo inring ru le," tiin Sachin Tendulkar-a club chu a vau nghal.

Hetihlai hian NorthEast United hian Ivory Coast international hlui Didier Zokora chu lakluh tumin an dawr fel tawh a, Tottenham Hotspurs midfielder hlui hian medical paltlang chiah a mamawh tawh.