Chanmari FC-in semifinal an thleng ta

I Day Football-ah Chanmari FC-in semifinal an thleng a, MFA Super Cup-ah a sang pali zinga inhlangkai turin Zo United an hneh. Lalsangzuala Hmar hoten tun season inelna hmasa ber aia hmasawn turin Mizoram Police an hneh a ṭul dawn a, August 25-a khelh tur semifinal a hmuhnawm ang.

Nizan inkhelah hian Chanmari FC tan Mal-sawmfela, Ṭhasiama leh C. Lalmuanawma te'n goal an khung a, Zo United tan Lalnunpuia leh Lalbiakkima ten khung ve bawkin 3-2 in inkhel a tawp.

Goal 1 ve ve

Chanmari FC-in bul an ṭan ṭha a, Zo United tlar hnungah hrem vanga captain Malsawma Chhangte awm loh a lang nghal hle.

Lalsangzuala Hmar hoten inkhel thununin Malsawmfela leh Lal-ruatfela Zote hmangin goal chance an insiam a, minute 13-naah goal hmasa ber a lut. Zo United-in an insiamṭhat lawk loh an tuar a, vei lam aṭanga defender Lalmuanawma cross chu changtu nei lo Sawmfela'n chiang zetin a tauh lut.

Chanmari FC-in goal an thun hnuah an fimkhur tawk lo a, keeper Lalmuanawma vawm chhuah sual vangin Zo United winger Laldinliana Varte-in chance ṭha nei mah se a pet goal thei lo.

Zo United tlar hnungin ngai awh chhoin Kolasib tlangval Dominic-a leh Lalnunpuia te an inthlawp ṭha a, midfielder H. Lalmalsawmtluanga leh Laldinmawia hmangin inkhel an thunun zui bawk.

Zo United defender Nunpuia'n corner aṭanga ball kal a tauh over hnuah minute 34-naa Mala freekick pet a tauh lut nalh hle. Goal luh belh theih tur khawpin innawr tawn mah se first half-ah goal a luh belh lo.

Hmuhnawm

Inkhel ṭantirh ang thoin Chanmari FC-in bul an ṭan ṭha a, R. Malsawmtluanga freekick aṭangin crossbar a tauh per a, goalline a pelh lohna a tam lo. Minute 52-naah Chanmari wing back Thomas Lalengkima cross ball ṭha chu Ṭhasiama'n goal-ah a chantir a, inkhel an thunun rah an seng.

Goal chhuah hnuah Zo United an harh leh a, R. Lalthantluanga'n Chanmari defender-te bumin ṭha takin lalut mah se a hmawr an bawk fuh lo. Hemi hnu hian Mala corner pet chu goal khungtu Nunpuia'n tauh fuh lehin crossbar a fuh avangin Chanmari FC an him hram.

Lalmuanzova luh hnuah Chanmari FC inkhel a nung a, injury time-ah MS-a freekick pet chu Zo united keeper chetsual vangin C. Lalmuanawma'n a tauh lut. Amaherawhchu Zo United-in substitute Lalbiakkima hmanga goal an khung leh nghal zat avangin Chanmari FC ngaih ṭhain an awm lo a, boruak sang tak chungin inkhel a tawp.

Inkhel Result

Zo United FC 2- 3 Chanmari FC

ZUFC : Lalnunpuia 34'; Lalbiakkima 90+4'

CFC : Malsawmfela 13'; Ṭhasiama 52'; C. Lalmuanawma 90+2'