Goal hmaa vannei Police chak

MFA Super Cup semifinal lut hmasa ber chu first division club Mizoram Police FC an ni. Nimin tlai khan Police-in MPL club Dinthar FC chu 3-1 in an hneh.

Dinthar FC an vanduai a, an khelh ṭhat ber niah goal hmaa an vanduai avangin hnehna an chang zo lo a, Police-in striker ṭha F. Lalrinpuia goal hnih leh Lalsangbera goal an vanneihpui.

Police an vannei

Dinthar FC tan Lalruatpuia'n minute hnih lekah box pawn aṭangin kawh pawtin a pet lut nghal a, Police tlar hnung an insiamṭhat phah lo. MPL club tan R. Lalnunmawia, Samuel Laltlanthanga leh Michael Lalremruata te'n goal khung belh theihna hun ṭha an hlah.

Mizoram Police-in awmze neiin goal nawr thei lo mah se minute 27-naa F. Lalrinpuia (Valpuia) pet chu Dinthar keeper Lalrinhlua'n ho lam takin a chhuah. Hemi hnu hian Police game a ziaawm a, winger tlan chak Lalbiakhlua thawhrah sengin Lalsangbera'n Police goal hnihna a khung.

Second half-ah Dinthar bawkin goal chance an ngah - captain Samuel-a, R-a leh Ruatpuia te'n an pet goal theih loh bakah Michael-a'n hun tawp dawnah penalty a hlah. Police erawhin an chance neih ang an khung thung a, minute 74-naa Biaktea cross chu Valpuia'n ṭha takin a tauh lut a, 3-1 in inkhel a tawp.

Inkhel Result

Dinthar FC 1 - 3 Mizoram Police FC

DFC : Lalruatpuia 2'

MPFC : F. Lalrinpuia 27', 74'; Lalsangbera 43'