UEFA-in Financial Fair Play dan thlak danglamna a pawm

Europe khawmualpuia football thuneitu sang ber UEFA chuan Financial Fair Play (FFP) dan thar a duan chu hman ṭan theih turin a pawm. FFP duan tharah hian club te'n sum lama hlawkna ṭha zawk leh uchuak taka sum hman a awm lohna tur ruahman a ni.

FFP hi club te'n an sum lakluh aia tam player lei nana an hman loh nan leh pawisa an hloh nasa lutuk tur ven nana duan a ni a, dan bawhchhetute chu pawisa chawi tir an nih mai bakah UEFA competition khel thei lo tur hiala hrem theih an ni.

Manchester City, Paris Saint-Germain leh Inter Milan te chu FFP dan hnuaiah hian hrem an lo ni tawh a, mahse thla hmasa khan FFP hi khauh lo leh nem zawka kalpui tum a nih thu UEFA president Michel Platini chuan a lo sawi tawh a ni.

Thawhṭannia Czech Repub­lic khawpui Prague-a UEFA executive committee ṭhukhawm chuan FFP thlak danglamna hi an pawm a, July 1 aṭanga hman ṭan tura ruahman a ni.

FFP duan thar chungchangah hian Platini chuan, "Tuna FFP dan thar kan pawm tak hi a awmzia takah chuan FFP tih chak lehzualna leh huam zauh tir lehzualna a ni a, a pumpui ang chuan FFP hi a la danglam thui lo," a ti.

Platini chuan FFP thar hnuai­ah chuan sum hman uchuak vanga club tenau zawkte harsatna tawh mek chu tih ziaawm a nih tur thu sawiin rahbi thar leh hmasawnna duhawm zawk an hmaah a inchhawp thu a sawi.

UEFA thuchhuak chuan, "Tuna FFP dan thar kan duan angah chuan club-in sumdawnna leh neitu thar neih chungchangah emaw, sum leh pai an chet tir danah FFP hre reng chungin hma an la ṭhin tur a ni. Club te chu sum an hman dan leh chet danah uluk zawka zirchian an ni ang. Hetih rual hian khawvel sum leh pai dinhmun chhiat vanga club dinhmun phet thut an awm chuan chung club te dinhmun chu FFP katlang hian ngaihtuah a ni dawn a ni," a ti.

European Club Association chairman Karl-Heinz Rumme­nigge chuan FFP dan thar chu ṭha a tih thu sawiin hun lo la awm zel tur atan club te'n an hlawkpui zawk a rin thu a sawi.

Bayern Munich chairman ni bawk Rummenigge chuan, "FFP hi club te tan chuan an sum hman dan thunun nana thil ṭha tak a ni a, ECA chuan club zawng zawngte he dan thar hi ngaipawimawha zawm turin kan sawm a ni," a ti.