Guus Hiddink a bang
Guus Hiddink chuan Netherlands head coach a nihna Thawhṭanni khan a bansan. A contract neih laiah chuan nakkum France European championship zawh thleng Dutch team hi enkawl tur a ni a, mahse thla sawm chauh hun a hmang hman tihin a hna hi a bansan ta a ni.
Kum 68-a upa manager hian nikum August thla khan a vawi hnih nan Netherlands national tem hi a enkawl a, mahse beisei angin a hlawhtling ta lo. Match sawm a kaihhruai aṭangin vawi nga ngawt tlawmpuiin an khingpuite vawi li a inhnehtawk pui bawk.
Netherlands hi Euro qualifying group B-ah awmin an group hmahruaitu Iceland chu point ngaiin an phak loh bakah an chungah hian anni aia point thuma sang Czech Republic an la awm bawk.
Nakkum Euro atan hian Group hrang hrang pakua aṭangin a sang pahnih leh pathumnaa point hmu sang berte chu direct-in an tling dawn. Group tina pathumna dang pariatte chu qualify turin an inkhelh kual leh a ngai thung ang.
Dutch manager Hiddink chuan, "Hetiang thutlukna siam a ngai hi pawi ka ti khawp mai. A vawi hnih nana kan ram team ka enkawl thei kha ka tan chuan a ropui em em. Mahse kan duh leh tum angin kan che ṭha si lo. Ka thawhpui leh player te nakkum Euro an khelh theih ngei na turin duhsakna ka hlan e," tiin a sawi. Hiddink hian kum 1994-1998 chhung khan an ram team hi a lo enkawl tawh a ni.
Kum 28 zet coaching hna a thawh chhungin Hiddink hian club hrang hrang Real Madrid, PSV Eindhoven leh Chelsea a enkawl tawh bakah ram hrang hrang Australia, Russia, Turkey leh South Korea te a lo enkawl tawh bawk.