Transfer chungchangah Arda Turan a ṭawng chhuak
Premier League club lian Chelsea leh Manchester United te inbiakna neihpui mek anga an sawi Atletico Madrid midfielder Arda Turan a ṭawng chhuak a, transfer thuthang zawng zawng chu thutak bawl a bawl vek tur a nih loh thu a sawi.
Turkey international midfielder hian tun nipui transfer-ah kum li lai hun a lo hman tawhna Vicente Calderon chhuahsan a tum a, Premier League lam a hawi thu player agent berin a sawi avangin a club luh tumna ber an inrinsiak.
Turan-a agent Ahmet Bulut chuan a player hian Premier League lam a hawi thu a sawi a, hetihlai hian Paris Saint-Germain leh Milan-in an biak ve reng thu a sawi bawk.
Hetiang thuthar vel karah hian Spanish newspaper AS chuan Galatasaray player hlui hi Chelsea leh Manchester United te nen inbe mek angin an chhuah a, hei hi Turan chuan a pha a ni.
Madrid khawpuia a cham chhunga La Liga, Europa League leh Copa del Rey title chawitu Turan chuan, "Ka chhuahna tur chung changa thuthang awm zawng zawng hi a dik vek lo. Tunah hian club pathum pali vel nen ka agent-te an inbe mek a, thutlukna siam a nih hunah chuan kan inhriattir dawn nia," tiin twitter lamah a ziak a ni.
Kum 28-a upa midfielder hi Premier League club zingah Liverpool chuan an rim ve mek nia sawi a ni bawk.