Dzeko-a'n Roma a hnaih

AS Roma midfielder Miralem Pjanic-a'n an ram Bosnia tana a khelhpui Edin Dzeko nen season thar aṭangin club khata an khelh tur thu a sawi a, hei hi Italy media lamin an ṭawmpui.

Manchester City striker Edin Dzeko agent Irfan Redzepagic erawhin Pjanic hi chhangin, "Tlang taka sawi chuan Pjanic hian ka hriat loh a sawi a nih chuan thuhran a ni. Roma nen hian kan inbe lo a, club leh club an indawr leh dawr loh pawh ka hre lo," a ti.

Dzeko agent hi ṭang na viau mah se Sky Sport Italia chuan Dzeko leh Roma-in inremna an nei tawh a, tunah chuan club pahnih inbiakrem chiah an mamawh tawh niin a tarlang.

Sky Sport Italia chuan Dzeko hian kum khata euro maktaduai 4.5 hlawh turin kum nga atan contract a ziak dawn niin a tarlang. Bosnian striker hian Man City-ah kum khatah euro maktaduai 5.5 a hlawh a, a hlawh tur zat tih hniam pawh pawi a ti lo niin an tarlang.