Wimbledon Mipa leh hmeichhe number 1 an chak nghal

Thawhṭanni tlai khan khawvela tennis tournament upa ber Wimbledon chu khelh ṭan a ni ta a, mipa leh hmeichhiaah World number 1 ve ve an chak nghal. Champion lai Novak Djokovic chuan a match hmasa berah Philipp Kohlschreiber a hneh.

Serbian seeded pakhatna hian centre court-ah 6-4, 6-4, 6-4 in Germany star Kohlschreiber hi a hneh a ni. Djokovic hian vawi 20 zet unforced error nei mah se a service a hum vek bakah set tinah hian a khingpui service a chhuhsak vek a ni.

Nakkum Australian Open zawh rual a tennis chawlhsan tum Lleyton Hewitt erawh a match hmasa berah Jarkko Nieminen hneh loin a tla nghal. Kum 2002 khan Hewitt hi helai hmunah hian a lo champion tawh a, kumin hi Wimbledon a khelh hnuhnun ber tur a ni ang.

Kum 34-a upa Australian star hian inkhel inhnehtawk takah 3-6, 6-3, 4-6, 6-0, 11-9 in Finland star hi a hneh lo a ni. Nieminen hi kum 33-a upa ni tawh mah se tun ṭum hi Wimbledon a vawikhat khelhna chauh a la ni. Second round-ah champion lai Djokovic a hmachhawn leh ang.

Hmeichhe lamah World number 1 Serena Williams-i'n a match hmasa berah Margarita Gasparyan lakah harsatna a tawk lo.

Kum 33-a upa ni tawh mah se Williams hian a vawi khat nana Wimbledon khel ve chauh Gasparyan hi 6-4, 6-1 in a hneh a ni.

French Open leh Australian Open champion lai Williams hi a khelh ṭhat ber ni chu a ni hauh lo, a khingpui hian vawi ruk zet a service chhuhsak theihna hun a hmu. Amaherawhchu tawnhriat ngah Williams hi a chesual nasa duh lo a ni.

Inkhel dangah Maria Sharapova chuan a khingpui Johanna Konta chu 6-2, 6-2 in harsa lo takin a hneh bawk.