Match fixing-ah Catania president inhnamhnawih

Tun hnaia match fixing vanga thubuai siamsak Serie B club Catania president Anto­nino Pulvirenti chu Serie B match ṭhenkhatah thamna sum £71,000 a seng niin sawi a ni.

Catania police-te chuan June 23 khan tham­na sum chelek thubuai vanga mi pasarih an man zingah Pulvirenti hi an man tel a, he thubuai ngaihtuahtu zinga dan hre mi Giovanni Salvi chuan Pulvirenti hi an dawpnaah a inpuan thu sawiin Serie B match nga laiah thamna sum a chelek thu a sawi.

Thawhṭanni khan Pulvirenti-a ukil chuan Catania club neitupa hi an puhna lakah a fihlim ngei tih mipui hmaa pholan a tum thu a sawi ve thung.

Catania club website chuan an club neitupa Pulvirenti hian division hniam lama an relegate loh nan mi ṭhenkhat chu thawhpuiah a sawm ngei thu an sawi a, hmalakna erawh engmah a awmchuan loh thu an sawi a ni.

Season hman zawh takah khan Catania hi an che chhe hle a, Serie B-ah 15 na dinhmunah awmin point hnih chiahin division hniam lama tlak theihna aṭangin an him.

Catania hi 29 March - 24 April inkar chhung khan match ngaah rawn chak chhoin Serie B-ah an inhamtan phah. Thawklehkhata an rawn che ṭha phut hi rinhlelh niin chhui chian a ni a, sorkar lam dan hremi te chuan khang zinga match liah tal kha chuan thamna sum inrawlha an ngaih thu an sawi a ni.

Pulvirenti bakah hian a thachhangdawltu Pablo Cosentino leh Catania director of sport hlui Da­niele Delli Carri te chu an in pawn lam chhuahsan thei lo tura hrem an ni. Tunah hian an vaiin mi 19 chu chhui chian mek an ni a, chhui chian zingah hian player leh agent engemawzat an tel nghe nghe.

Italian football-ah hian thamna sum a inrawlh nasa hrim hrim a, thla hmasa lawk khan mi 50 zet chu third division leh semi-professional league a match fixing thubuai vangin man an lo ni tawh bawk.

Kum 2006 khan Juventus, Lazio leh Fio­rentina te chu Serie A aṭangin Serie B-ah paih­thlak an lo ni tawh bawk a, Juve phei hi chu kum 2005 leh 2006-a Serie A nomawi an chawi chu hlihsak an ni.