Local Transfer

Chanmari FC : Thlanga Out; Zara In

Mizoram Premier League Season 2 champion Chanmari FC chuan hun ropui thlenpuitu coach H. Vanlalthlanga nena an thawh dunna an titawp a, veteran coach thlak turin HC Zarzoliana an la lut.

Thlanga hun a liamta

Chanmari FC chuan 'Thank you Sir Thlanga' tiin an facebook page-ah Thlanga an thlah. College Veng pachal Thlanga hian Chanmari FC hi match 67 kaihhruaiin vawi 50 a chak pui a, vawi kua chiah an chak lo a, an khingpui vawi riat an draw thung.

SYS FC hlawhtling taka enkawltu Thlanga hian January 2013 aṭanga June 2015 chhungin Chanmari FC hi MPL2, MFA Cup leh I Day Football-ah vawi khat ṭheuh a champion pui a, MFA Super Cup-ah ṭum hnih a champion pui bawk.

Season hnuhnung berah khan Chanmari FC-in MPL3 final-ah I Day Football semifinal-a an hneh loh Aizawl FC lakah penalty shootout-ah an tlawm a, I League second division-ah pathumna an ni.

Chanmari FC chuan, "Sir Thlanga kan chan hi hreawm kan ti a, club tana a inpekna leh thawhrimna a ropui kan ti a, Chanmari FC a awm chhung chu a hming a dai tawh ngai dawn lo a ni. A kal zelna turah duhsakna sang ber kan hlan a ni," tiin thuchhuah an siam.

Zara hun a inṭan

Chanmari FC coach thar Zara hi Mizo coach-te zinga sulhnu nei ṭha ber zinga mi a ni. Zara hian Mizoram Premier League ṭan kumin Dinthar FC a champion pui nghal a, nikum season khan I Day Football-ah a champion pui leh bawk.

Chanmari coach thar Zara hian Mizoram vawi engemaw zat a lo kaihhruai tawh. National Institute of Sports (NIS), Kol­kata aṭanga Diploma Course a zirchhuah kumin National U16 championship (2010)-ah Mizoram a champion pui nghal. Kum 2012 khan Dr. T.Ao Football leh Northeast Games-ah Mizoram a champion pui a, kum 2014-a Mizoramin Santosh Trophy leh Dr. T.Ao Football an champion khan assistant coach a ni bawk.

Zara hi a inkhelh hun laiin player hlawtling a ni a, National U-16 (2003), Subroto Mukherjee Cup (2003) leh North East Games (2005)-ah te Mizoram a champion pui tawh bawk.

Chanmari FC chuan "Pa­thianin coach ṭha tak min pe hi kan lawm a, theihtawp chhuahin kan coach thar hi kan thlawp dawn a; duhsakna kan hlan ni," tiin thuchhuah an siam.