Copa America An ramah Chile-in final lut

Chile chuan kum 28 hnuah Copa America final an lut leh ta. Thawh­lehni zing khan tournament thlengtu Chile hian Eduardo Vargas goal hnih thun hmangin Peru 2-1 in an hneh a ni.

Peru defender Carlos Zambrano chu Chile midfielder Charles Aranguiz a hnung lam aṭanga a tlawh avangin referee Jose Argote-a'n a hnawtchhuak. Peru hian minute 70 chhung chu player 10-in an khel a ni.

Kum 99 chhung zet an champion tawh lohna tournament-ah hian champion tur chuan tukin zinga Argentina leh Paraguay inkhela a chak zawk hi Pathianni zingah an hneh leh a ṭul ang.

National Stadium-a inkhelah hian Chile-in bul an ṭan ṭha zawk a, inkhel ṭan phat aṭangin ball an chang tamin an hlauhawm nghal. Arsenal forward Alexis Sanchez-a'n goal bar a pet per hnu lawkah Napoli striker Vargas-a'n hmahruaina goal a khung.

Second half-ah Chile defensive midfielder Gary Medel chuan an­mahni lamah a tih luh palha avangin Peru lamin beiseina chhete an nei thar. Amaherawhchu goal hmahruai khungtu Queens Park Rangers striker hlui hian yard 25 a hla aṭangin goal ropui a khung. Peru goalkeeper Pedro Gallese tan dan ngaihna a awm lo.

Juventus midfielder Vidal chuan Zambrano hmaiah a kuta a nawr vangin hrem ngei tura ngaih ni mah se a vanneih a siamin hremna a pumpelh hlauh.

Kumin Copa Ame­rica-ah hian player nung­chang mawi lo an awm nual tawh a, Brazil super star Neymar chu Colombia an hneh loh ṭumin hnawhchhuah niin match li khel thei lo tura hrem alo ni tawh. Chile midfielder Vidal chu zu rui chunga motor a khalh vangin hrem a ni tawh bawk.

Anni pahnih bakah hian Gonzalo Jara chu Edinson Cavan lakah mawi lo taka a chet avangin match hnih chhung hrem a ni bawk. Peru defender Zambrano chet dan pawh hi chhui chian a nih hnuah hremna a hmachhawn ngei tur a ngaih a ni.

Chile tana goal hnih khungtu kum 25-a upa Vargas chuan, "Inrinni khan goal khung ka zir a, goal lam hawia ka pet a piang a luh vek avangin inrintawkna sang tak nen ka inkhel. A rah chu kan hmu e, ka khup na vangin ka buai deuh ang tih kha ka hlau hman khawp a, mah se Pathian zarah harsatna nei loin ka khel tluan thei," a ti.

Vargas hian an ram tan goal 22 khung tawhin attacking midfielder chawl tawh Jorge Ara­vena nen an intluk chiah. Ani aia khung tam mi paruk an la awm bawk.

Peru coach Ricardo Gareca chuan, "Eng inelnaah pawh a thlengtu nena in inkhel a nih chuan a harsa ṭhin. Chutih laiin player 10 a khelh chu a ngaihna a awm lo a ni e. Khelmualah khan kan theihna zawng zawng kan lantir a, mahse chu chu chak nan a tawk zo si lo. Champion ngei turin duhsakna kan hlan e," tiin a sawi.