Ramos chungchangah United-in Real an dawr
Manchester United leh Spanish defender Sergio Ramos an sawi zawm chu thuthang satliah a ni lo. English club hian pound maktaduai 28.6-in Real Madrid an dawr a, Spanish club-in an la chhang let lo.
Kum 29-a upa defender Ramos contract neih lai hi kum 2017 khian a tawp dawn a, Red Devils hian Spanish defender hian a contract neih lai hi a pawtsei duh loah an ngai.
Spain international Ramos hi club tan vawi 445 a inlan tawh a, ram tan vawi 128 a khel tawh bawk. Real Madrid-ah hian nomawi chawi theih zawng zawng a chawi vek tawh a, Spain-in Euro 2008, Euro 2012 leh 2010 World Cup an champion ṭumin starting eleven a chang vek bawk.
United manager Louis van Gaal hian season thar atan tlar hnung tih chak a tum a, Ramos hi an lak tum zinga hraw ber a ni.
Manchester United hi Southampton midfielder Morgan Schneiderlin nen sawi zawm an ni bawk. Report ṭhenkhatah chuan kum 25-a upa French midfielder hian United hi a hnaih viau tawh angin an ziak a, amaherawhchu Saints manager Ronald Koeman ṭawngkam aṭangin lut mai tur chu a la ni lo.
Dutch manager hian Schneiderlin hi Saints-ah a ngheh loh thu a sawi a, chutihrualin chhuak tur chuan pawisa ṭhahnem tak lo chuan chhuah tur an tum lo tih a sawi tel bawk.
Koeman chuan, "Sumdawnna kan ṭan dawn chauh a ni. Tuna min dawrna chin chu engmah tham a la ni lo," tiin a sawi.