Arsenal keeper thar Petr Cech
Premier League goalkeeper zinga record nei ṭha ber ang hiala chhal theih Petr Cech-a'n Chelsea chhuahsanin Arsenal a zawm.
Kum 33-a upa Cech man zat hi official-a puanzar a ni lo a, pound maktaduai 10 bawr vela ngaih a ni. A contract sei zawng hi kum li niin kar khatah pound nuai khat a hlawh ang. Chelsea manager Jose Mourinho chuan veteran keeper thlak tur hian Stoke City keeper Asmir Begovic lak luh tumin a hel mek.
Czech Republic keeper hi Stamford Bridge-ah kum 11 a cham chhungin club tan vawi 400 chuang a inlan a, nikum khan Belgian keeper Thibaut Courtois a tluk loh avangin league-ah vawi sarih chauh a inlan.
Arsenal boss Arsene Wenger chuan, "Petr Cech hi ka player ngaihsan a ni a, ka club a rawn zawm hi ka lawm takzet a ni. Season rei tak chhung khawvel keeper ṭha ber zinga mi a nihzia a pholang tawh a, kan squad a ti chak ngei ang," tiin a sawi.
Arsenal player thar Cech chuan, "Arsenal ka zawm thei hi ka phur takzet a, practice ṭan hun ka nghakhlel tawh hle. Arsene Wenger-a'n club thil tum leh min hman duh dante min hrilh khan ka thutlukna chu a chiang a ni," a ti.
Chelsea manager Jose Mourinho chuan, "Thutlukna siamtu chu Jose Mourinho a ni a, pakhat leh chu Abramovich a ni a, a dang pakhat leh chu board an ni. Ka thutlukna chauh chu ni se Petr hi ka bulah a cham ang. A bak sawi belh tur a awm lo," tiin Cech a ui thu a sawi chhuak.
Arsenal Vs Cech
Cech hian Chelsea tana season 11 a khelh chhungin Premier League leh FA Cup title pali ve ve, League Cup title pathum bakah Champions League leh Europa League nomawi vawi khat ve ve a chawi. Arsenal keeper thar hian Premier League Golden Glove award ṭum thum a dawng tawh bawk.
Czech Republic keeper-in nomawi lian tham 13 zet a chawi chhung hian Arsenal-in nomawi pathum chauh a chawi a, Wenger-a hote champion-na hi FA Cup vek a ni.
Criteria Cech Szczesny Ospina
Pld 7 17 18
Minutes 606 1,499 1620
Starts 6 17 18
Goals Conceded 2 21 11
Clean Sheets 4 3 8
Saves 16 45 47
Chelsea fan-te hnena
Cech-a lekhathawn
Tun hun hi a thlen ka ring ngai lo a, tunah erawh Chelsea Football Club nena inṭhen a ṭul ta si. July 2004-a Chelsea ka zawm ṭan tirh aṭang khan club tan ka theihna zawng zawng ka chhuah a, club dang zawm loin helai hmunah hian football career ka tihtawp ka ring ṭhin. Amaherawhchu ka beisei ang vekin a kal bik lo.
Bul kan ṭan tirh aṭanga chhutin hun hlimawm kan tawng tam a, hun harsa kan tawng ngai meuh lo. England rama trophy lak theih zawng zawng kan la a, Europa League kan la leh a, a ropui ber erawh Champions League a ni. Team angin sulhnu ropui tak kan hnutchhiah a, ka hun tawn kha ka chhuang tak meuh meuh a ni.
Nikum nipui khan thil kalhmang a danglam ṭan a, first keeper ka ni lo tih ka hria. Season kan hmang chho a, first keeper ka chang dawn tawh lo tih ka chiang. Bench-a hun hmang ringawt turin ka la inphal lo a, chona thar hmachhawn turin rilru ka siam ta a ni.
Football ka khelh ṭan tirh ang bawkin tun thlengin hlawhtlin duhin ka tui hal a, club ṭha ber ber hmachhawn ka la duh avangin Abramovich hnenah Premier League-a cham zel ka duhthu ka hrilh. Ka tan chuan Abramovich hi a pawimawh takzet a, a tel lo chuan Chelsea leh kei hian tun hun hi kan thleng lo ang.
Chelsea Football Club-a players, staff, managers leh coaching staff te hnenah mimal takin lawmthu ka sawi a, an bula thawh nuam ka ti takzet a ni. Chutihrualin a pawimawh ber chu Chelsea ṭantute in ni. In tan theihtawp ka chhuah a, in hmangaih letna ka hmuh hian ka lawm a ni. Ka damchhungin ka theihngilh tawh lo ang.
Intawn hun kan la nei leh dawn a, chumi hunah chuan goal leh lamah min hmu tawh ang. Kan hun tawnte kha inhriat reng ka beisei a, ka thutlukna min zah sak ngei ka beisei bawk.
Chelsea FC kal zelna turah duhsakna ka hlan a, kum 11 chhung hun hlimawm tak min tawn tir avangin ka lawm e.