Chelsea an la chul lo
An thawm a na hluai rih lo a, an kal fawr hek lo - mahse Chelsea an la chuai vek lo. Enzo Maresca naute hian Thawhṭan zan Premier League inkhelah West Ham United chu 2-1 in an hneh.
Stamford Bridge-a inkhelah Hammers lamin goal an nei hmasa zawk; chawlhlawk hmain Jarrod Bowen chuan a khung, mahse second hlaf-ah Blues hian Pedro Neto hmanga an sut bakah Aaron Wan-Bissaka chuan an lamah ti lutin an inlehthal a ni.
London club pahnihte an fimkhur tawn a, goal khung theihna remchang an inpe duh lo. Mahse, chawlhlawk hma hretin Levi Colwill a chesual - Chelsea defender hian anmahni goal lamah ball a pass sual a, a nghawng a pawi hle.
Ball kal hi Bowen chuan la chang fuhin a tlan luhpui nghal a, duh tawka a insiamrem hnuah goalkeeper Filip Jorgensen dan hman lohin a pet lut. Nikum tawp lama hliam tuar Bowen chuan a dam chiang ta tih a takin a lantir.
Cola Palmer-a'n freekick aṭangin sut teuh viau mah se a lut lo chiah. Mualpho thei dinhmunah an ding tih hriain Maresca chuan player a siksawi, bench aṭangin Neto leh Marc Guiu Paz te a dahlut a, inkhel boruak a danglam.
Neto-a cross pawn lama chhuak tura ngaih chu Marc Cucurella chun a lo pet let hman a, midfielder Enzo Fernandez chuan a lo shot nghal pawh, lo dansak mah se ball per hi Neto chuan siphurh sut nan a hmang.
Chelsea an phur a, na takin an nawr chhunzawm bawk. Palmer-a cross chu Wan-Bissaka chuan lo pet chhuah tum mah se, anmahni goal lamah kalin mawi zetin a lut daih a, goal nei hmasa West Ham lamin an chhanglet thei tawh lo.
Blues manager Maresca chuan, "February thla hi chu a harsa ṭhin, match hautak tak tak khelh a ngaih ṭhin bakah match a tam a, chuvangin player zawng zawngte inkhel thei tura an inpeih a pawimawh takzet.
"Kan elpuiten match an khel hmasa zawk a, chumi hnuah rilru fim tak pu chunga match khelh ve leh theih hi a lawmawm," tiin a sawi a, goalkeeper thlan chungchangah a ṭha pahnih an neih avanga a lawmawm thu a sawi bawk.
Season kal laiah Blues keeper Robert Sanchez a chesual fo a, an match hnuhnung zawka Manchester City nen an inkhelh ṭum pawhin a tihsual avangin Erling Haaland chuan goal a khung phah, tun ṭumah chuan Filip Jorgensen a hmang ta zawk a ni.
Hnehna an chan avangin Chelsea hian Premier League match 24 aṭangin point 43 an hmu a, table-ah palina dinhmun an luah leh ta; an hnuai chiaha awm Man City leh Newcastle United te chuan point 41 an hmu thung a ni.
Nottingham Forest an che ṭha si a, kai thar team hian season thara Champions League khel phak an tum ngam mek - Forest an awm ve avangin a sang pali zinga tel phak a harsa zual dawn niin a lang.