Tel-a'n Spurs a zawm

Bayern Munich forward Mathys Tel chuan a puanthuah telin London lam a pan a, a tir lama a hnar nia an sawi Tottenham Hotspur chu season tawp thleng loan-a khel turin a zawm.

Kum 19 mi forward hian thlatir khan Spurs sawmna hi a hnar a, amah duhtu zingah Chelsea leh Manchester United pawh lam rik an ni. Mahse, a tawpah chuan Spurs zawm turin thutlukna siam a, season tawpah London club hian an duh chuan pound maktaduai 45-in a nghetin an lei zui thei ang.

France under-21 international Tel hian kum 2022 khan Rennes aṭangin Bayern Munich hi euro maktaduai 28.5 thlenga a man sang chho thei turin a zawm a, a season hmasa berah match 28 khelin goal ruk a khung. Season hmasa khan hmun pawimawh chang chhoin, match 41 a khel a, goal 10 khungin assist vawi ruk a nei bawk.

Mahse, tun season-ah coach thar Vincent Kompany-a hnuaiah hmun a chang tam tawk lo a, inelna hrang hrangah match 13 chiah la inlanin, heng zinga pathumah chiah bul a la ṭan a, goal a la khung lo a, assist vawi khat a nei.

Tel hian Bayern tlarhma lamah Harry Kane, Michael Olise, Leroy Sane leh Kingsley Coman te ho a elpui a, hei vang hian a tan Spurs pan mai hi thutlukna fing a ni.

London club hian tun season-ah beisei an phak lo. Premier League table-ah 14-na an ni mek a, mahse, Europa League-ah last 16 lut tawhin, League Cup semifinal second leg an la bak bawk.

Ange Postecoglou-a enkawl team hian Ningani zan dar 1:30-ah second leg khel turin Liverpool an lenchilh dawn a, first leg-ah 1-0 a hnehna an chan tawh avangin an inringtawk khawp ang.