Leipzig-ah Nedeljkovic a kal

Aston Villa full back Kosta Nedeljkovic chuan season tawp thleng loan-a khel turin RB Leipzig a zawm a, German club hian an duh chuan season tawpah euro maktaduai 15 thlenga a man sang chho turin an la lut thei ang.

Kum 19 mi defender hian Serbian club Red Star Belgrade aṭanga a professional zinkawng zawh ṭanin, Serbian club tho Grafičar-ah loan-in a lo khel tawh bawk a, January 2024 khan Villa hi zawm turin inremna a neihpui.

Mahse, season chanve chu loan-in a kir leh phawt a, tun season ṭan dawn khan £8mtd-in Villa hi a zawm. Mahse, Unai Emery enkawlna hnuaiah beisei angin hmun a chang tam tawk lo a, tun season inelna hrang hrangah match 10 chauh a la khel.

Serbian right back hi a kum la nau deuh mah se, a kum ngaihtuahin tawnhriat a nei ṭha viau a, Serbia tan match ruk a khel tawh.