Chilwell-a'n Palace a zawm

Chelsea defender Ben Chilwell chuan Crystal Palace chu season tawp thleng loan-a khel turin a zawm a, kum 28 mi fullback tan chanchin lawmawm a tling.

English left back Chilwell hi Chelsea boss Enzo Maresca chuan season ṭan dawn khan a ruahmannaa a tel loh thu a hrilh a, mahse, club dang zawm loin a cham.

April 2024 hnuah khan Premier League-ah a inlan leh tawh lo a, tun season-a a inlan awmchhun chu League Cup inkhela League Two club Barrow AFC an hmachhawn kha a ni - hetah pawh hian bench aṭangin a lut!

Stamford Bridge-a kum 2027 thleng contract nei Chilwell hi Maresca chuan a duh phawt chuan a ngheta a chhuah theih thu pawh a lo sawi tawh a, a ui lo hle.

Palace defender, Morocco international Chadi Riad chu season tawp thleng khup hliam avangin a khel thei dawn lo a, hei vang hian Premier League club hian defender thar an melh a, Chilwell an chang ta.

Chilwell hian kum 2020 khan Leicester City aṭangin Blues hi pound maktaduai 45-in a zawm a, kum nga chhung atan contract ziakin, April 2023 khan contract pawtsei mah se Maresca duhzawng a nih loh avangin a chhuak ta.