Ferguson-a'n Hammers a zawm

Brighton & Hove Albion forward Evan Ferguson chuan season tawp thleng loan-a khel turin West Ham a zawm a, Everton leh Bournemouth te nen pawh sawizawm ni mah se, a pu hlui Graham Potter hnuaia khel turin Hammers a zawm.

Kum 20 mi Ferguson hian 2021-22 season khan top flight football khel ṭanin, hetihlaia Brighton coach chu tuna Hammers enkawltu Potter a ni - 2022-23 season-ah phei chuan match 25-ah goal 10 ngawt a khung. Season hmasa pawh kha league match 12-a goal ruk khung chungin bul a ṭan a, hliamin a tlakbuak zui.

Ireland tan vawi 18 inlana goal li khungtu hian a dam hnuah ngai a awh leh rih lo a, inelna hrang hrangah match 36 khel tling mah se goal a khung zui lo. Tun season inelna hrang hrangah match 15 khelin goal khat chiah a la khung - heng zinga 11-ah hian bench aṭangin a lut.

Ferguson chuan, "West Ham hi club lian tak a ni tih ka hria a, he club zawmna hun ṭha ka nei hi ka lawm hle. Kan coach Potter hi ka hrechiang a, a hnuaia khelh ka châk tawh hle a ni," a ti.

Brighton head coach Fabian Hurzeler hnuaiah Ferguson hian hmun pawimawh a chang phak lo a, Danny Welbeck, Joao Pedro leh Georginio te a tluk lo.