West Ham-ah Ward-Prowse a kir

Nottingham Forest-a loan-a khel mek James Ward-Prowse chu a club West Ham-ah a kir a, season ṭantir khan club pahnih hi season khat atan inrem mah se, a loan hun titawp tur hian thutlukna an siam ta zawk a ni.

Club pahnih inremnaah hian loan hun a zawha inleina dan a tel lo a, hei vang hian Hammers-a kir tur hian harsatna a awm lo. Kum 30 mi Ward-Prowse hi set-piece pet thiam bik niin, Southampton-ah a hming a chher hle.

Mahse, 2022-23 season-ah khan EPL mawngphah luahin, Championship lamah an tla thla a, Hammers a zawm. London club tan hian a season hmasa berah match 51 khel nghalin goal sarih a khung a, assist vawi 12 a nei.

Season ṭan dawn khan Nottingham Forest hi loan-in a zawm a, mahse, beisei angin khelhna hmun a chang lo. Tun season-a che ṭha tak club tan hian inelna hrang hrangah match 12 khelin assist vawi khat chiah a nei.

West Ham chuan an midfielder kir thu hi puangin, "A tawnhriat, thiamna leh theihna ten kan squad a tichak sawt dawn a ni," an ti a, an midfielder chu lawm takin an lawm let.