Pathianni zanah EPL inkhel hmuhnawm Indin thar Chelsea mualah ṭha sa Liverpool

Premier League an khel ṭan chauh a, inkhel hmuhnawm hmuh tur kan nei nghal dawn - Pathianni zan dar 9:00-ah Chelsea-in Liverpool an mikhual ang. 

Chelsea boss Frank Lampard-a'n nipui transfer-a sum a sen hnem chhan chu top four aia sang thlen an tum vang a nih thu a sawi a, English coach hian champion a tum tihna a ni. 

Lampard-a tan Pathianni zan inkhel tur hi fiahna hautak tia sawi theih a ni a, he fiahna hi a paltlang a nih ngat chuan champion turin inrintawkna a neih belh sawt ang. 

Liverpool erawh sawi ngai loa team ṭha sa an ni a, season hmasaa point 18 ngawta sang fal chunga Premier League nomawi chawi thei an nih avangin Blues khelmualah pawh chak zawk tura beisei an ni. 

Premier League-in manager langsar tak tak inkara boruak lian a lo hmelhriat tawh ṭhin a, Manchester United legend Sir Alex Ferguson leh Arsenal siam liantu Arsene Wenger inkar boruak leh thluak 'game' te kha English top flight football tingaihnawmtu leh tihlutu an tling. 

'The Special One' inti ngat chunga Chelsea press conference hmasa ber hmachhawntu Jose Mourinho-a'n Rafael Benitez, Wenger leh Antonio Conte te nena boruak an neih dan te pawh ngaihnawm tak a ni. 

Tun hnaiah vantlang hriat turin Klopp leh Lampard an inkap zeuh zeuh a, Liverpool boss hian, "Eng boruak mah a awm lo," tiin phat mawi tum mah se an ṭawngkam hman duh dan aṭangin 'engemaw' chu a awm tih a chiang. 

He boruak thlir hian manager pahnih vang ringawt pawhin inkhel boruak a nung dawn tih hai rual a ni lo a, a hmunah inkhel entu awm dawn lo mah se a 'hot' na a danglam phah lo ang. 

Coach pahnih inkar boruak hi season hmasa Premier League-a Reds-in 5-3 a Chelsea an hnehna inkhela inṭan a ni a, referee thutluknaa lungawi lo Lampard chuan ṭawngkam mawi lo takin Klopp leh a thachhang dawltute chu mual sirah a bei. 

Lampard hian inkhelh zawhah a ṭawngkam hman avanga a inchhir thu sawi mah se a pawlte thlavang a hauhnaah erawh a inchhir loh thu a sawi a, Klopp chuan English coach hi tawnhriat nei tlem tak a la nih avangin inkhelh zawhah chuan boruak ṭha lo kalsan a zir a ṭul thu a sawi zui!

Nipui transfer a inher chhuak a, Lampard-a'n pound maktaduai 200 chuang sengin player thar a lalut. Klopp chuan hei hi kapin, "Liverpool kalphung a ni ve lo," a ti a, uchuak taka sum sen a tum loh thu a sawi - a thlawptu chu Chelsea boss hlui Mourinho a ni!

Mourinho hnuaia player a nih laia vul em em Lampard a insum duh bik lo a, "Klopp-a thusawi hian kan nuih a ti za a ni," a ti sak - Pathianni zanah an intawng dawn a, chak lo zawk nih an duh dawn lo. 

Nipui transfer-ah player thar an lak nual avangin Chelsea inkhel hi English top flight-ah chuan nghahhlelh ber pawl tia chhal ngam a ni a, Lampard-a naute hian an match hmasa berah Brighton & Hove Albion chu 3-1 in an 

hneh nghal. 

Inkhel pumpui thlir erawh chuan Chelsea hi an vannei tel ve tih a lang a, chutihrual chuan Lampard hian a duh ang takin squad a la rem thei lo bawk - Pathianni zanah erawh Brighton aiin an zia deuh tura ngaih a ni. 

Thiago Silva chuan club training a zawm tawh avangin a in fit pangngai tawh a, hliam vanga season bul ṭan thei lo Ben Chilwell chuan regular takin training a nei tawh bawk. Hetih rual hian player pahnih luhtir nghal hi Lampard tan a la hma mah mah mai thei bawk. 

Liverpool nen pawha sawi zawm hlawh hman Timo Werner-a'n Brighton a hmachhawn tawh a, Reds pawh a hmachhawn thei ang.

Kai Havertz-a'n match hmasa ber khel mah se a la tlangnel tawk lo niin a lang a, Liverpool lakah Blues fan-ten Havertz tak tak hmuh an beisei ang. 

Bayern Munich midfielder thiam bik Thiago Alcântara-a'n Liverpool a zawm dawn tih a chiang tawh a, transfer bazar thawm reh takah Reds fan-ten lawmna tur an nei ve leh ta. 

Alcântara hian Reds zawm dawng chiang mah se Stamford Bridge-a inlan ngaihna erawh a awm lo a, a team thar tur inkhel hi a entu lamah a lo ṭan ve rih phawt a ngai ang. 

Jurgen Klopp-a'n 4-3 a Leeds United hnehtu team aṭangin a squad a siksawi chiam a rinawm hran lo a, hetih rual hian tlarhnung lam erawhin kai thar team laka goal thum ngawt an chhuah avangin insiamṭhat an zir a ṭul ang. 

Match hmasa bera hattrick siamtu Mohamed Salah bakah Sadio Mane leh Roberto Firmino an awm avangin goal khung lamah an ngaihtuahawm loh a, tun hnaia tlarhnung lama chetsual ching Virgil van Dijk erawhin fimkhur thar a mamawh. 

Season hmasaah chiang takin champion mah se an match hmasa ber aṭanga tehin Liverpool hi chesual thei an ni tih a chiang a, Jurgen Klopp pawh a ṭawng fimkhur hle. 

Liverpool boss chuan, "Kil tinah player hlauhawm tak tak an kawl. Player ṭha tak tak an lalut a, awihawm loh khawpa team ṭha an nei mek a ni," tiin an hmachhawn tur team chu a fak. 

German coach chuan sawi chhunzawmin, "Season hmasa kan intawn pawhin Chelsea hi team tum harsa tak an ni tawh. Christian Pulisic a dam tawh ka ring a, Mason Mount an nei a, Kai Havertz hi Bundesliga aṭanga ka hriatchian tawh a ni," a ti bawk. 

Lampard-a'n player thar a lakluh zingah Hakim Ziyech chu a chhawr thei dawn lo chiang a, Liverpool squad pumpuiah Alex Oxlade-Chamberlain chiah inhliam awmchhun a ni rih thung.