Milan-in Chelsea dilna an hnawl

Chelsea-in pound maktaduai 30-a centre-back Alessio Romag-noli lakluh an dilna chu AC Milan in an hnawh niin Sky Italy in an ziak.

Romagnoli hian nikum khan pound maktaduai 21-in Roma aṭangin Milan a zawm a, season khatnaah hian Serie A-ah match 34-ah inkhel bul ṭanin Italy lam-ah chuan Milan defender ṭha Alessandro Nesta leh Thiago Silva te nen an khaikhin der tawh.

Milan hian kum 21-a upa Romagnoli hi tun nipui bazarah chuan chhuahtir an tum lo niin hriat a ni a, amaherawhchu Blues-in sum an thehchhuah tam chuan Italian club hian an ngaihdan an thlak thei ang. Chelsea nena sawi zawm Napoli centre-back Kalidou Koulibaly pawhin a club khelh mekna a awm nghet turin thutlukna a siam tawh niin Sky Italy chuan an ziak bawk.

Chelsea hian defender an mamawh belh a, Inrinnia Watford 2-1 a an hneh ṭumin Antonio Conte chuan a sawi chhuak nghe nghe. Italian manager chuan, "Kan squad hi inthlir chuan defender panga chiah in hmu ang a, chung zinga pali chuan Watford an hmachhawn. Pakhat dang leh chu academy player Ola Aina a ni a, Ola hian hmabak êng tak nei mah se a kum a la naupang deuh. Kan player zinga pakhat pawh an inhliam emaw hrem an nih chuan kan buai a ni mai a, chuvangin kan squad tichhah turin kan chhuah zel a ni," tiin defender an mamawh belh tih a pha lo.

Blues hian Premier League match hnih an khelh tawhah West Ham leh Watford te 2-1 ve ve in an hneh a, Conte hnuaiah goal vehim an la nei lo.