Rio Olympic 2016 chanchin ngaihnawm

Hnuhma ropui siam tawh sa khumin a awm a, sulhnu ropui hnutchhiah niin thawnthu thar ziahin a awm. Mi ropuiten an ṭhat chungchuan bik zia an lantir nawn leh a, a ṭha ber thar an lo piang chhuak bawk. Ni 16 chhung leka ram hrang 207 aṭanga infiammi 10,000 chuang kalkhawm ten Rio Olympic 2016 a gold medal 306 an inchuhna chanchin hi a ngaihnawmin a ropui tel bawk.

Entu an tam

Khawtlang lam chanchin-thar thehdarhtu lian leh lar ber pakhat BBC chuan Rio Olympic kha mipui entheih turin a chhawp chhuak. BBC kaltlang hian TV-ah khawvel hmun hrang hrang aṭangin mi maktaduai 45.24 zetin an en a chhut a ni a, tun hmain FIFA World Cup emaw European Championship emaw pawh ni se hetiang entu tam hi BBC in a la tawng ngai lo.

Internet lam aṭanga entu pawh an pung chho zel a, BBC website tlawh theihna hrang hrang computer, phone, tablet leh a dangte aṭanga entu hi UK-ah ringawt maktaduai 68.3 niin khawvel pum aṭang chuan maktaduai 102.3 zet an tling a, hei pawh hi record thar tho a ni - ''The greatest show on Earth" tia hming an vuah hi a mak lo.

US nge nge

Pakhatna US khan gold medal 43 an la a, kum zawna an champion bakah Olympic-a pakhatna ṭum 17 ni thei hmasa ber an ni. 1984 Los Angeles-ah khan US hian medal 174 an lo la tawh a, hemi ṭum tih lohah chuan kumina medal 116 an lak hi a tam ber ṭum a la ni.

Olympic chanchinah US hian hnuhma an nei ṭha fal hle a, gold 1,022 la tawhin an mahni hnaih bertu Russia chuan 395 an la tawh - pathumna chu gold 261 latu Britain an ni thung.

Record thar chu

Rio-ah hian archery, athle-tics, modern pentathlon, track cycling, shooting, swim-ming leh weigh-tlifting aṭangtein world record thar 27 zet siam a ni. American tuihleuh thiam hmingthang Ktie Ledecky-i'n 400m leh 800m freestyle-a record thar a siam te chu a lang-sar zual a ni.

World champion Pole Anita Wlodarczyk chuan hmeichhe hammer throw-ah ama record lo siam tawh sa khumin 82.29m zet a thui a theh a - record thar a siam.

Kum 1999 Sevilla-ah khan Michael Johnson chuan 400m world record a lo siam tawh a, kum 17 chhung zet khum thei an awm lo. South Africa tlangval Wayde van Niekerk chuan second 43.03 chhunga tlan thlengin Johnson-a record lo siam tawh hi second 0.15 in a rawn khum a ni.

Hnuhma ṭha

• Japanese artistic gymnast Kohei Uchimura chu kum 44 chhunga gymnastic all-around title humhim thei hmasa ber a ni a, an ram chu team champion a nih pui bawk.

• South Korea chuan thalkah (archery) a gold medal awm thei pali chu a vawi khat nan an hui vek. Olympic hnuhnung pakua aṭanga he inelnaa gold medal awm zawng zawng 36 aṭanga 23 lai an la thei - hei hi 76.67% zet a tling.

• Great Britain long distance runner Mo Farah chuan 2012 London-a a lo tih tawh angin 5,000m leh 10,000m-ah gold a la. Finland tlangval Lasse Viren chuan heng inelna pahnihah hian 1972 Munich leh 1976 Montreal-ah a zawnin gold a lo la tawh bawk a, anni pahnih chiah hi hetiang dinhmun luah thei an la ni.

• World number 2 Andy Murray chuan mipa single ten-nis final-ah Juan Martin del Potro a hneh a, ani chiah hi Olympic mipa tennis gold medal vawi hnih la thei a la ni.

• Jamaica sprinter Elaine Thompson chu kum 28 chhunga 100m leh 200m gold la kawp thei hmasa ber a ni. Kum 1988 Seoul khan Florence Griffith-Joyner chuan hetiang dinhmun hi a lo luah tawh bawk.