'Pathau' goal khung thiam Higuain!
Tun hnaia a thau em vanga sawisel hlawh Gonzalo Higuain chuan 'Ka thau thu lo sawi zel ula, keiin goal khung ka lo chhunzawm zel thung ang," tiin amah sawiseltute a chhanglet!
Kum 28-a upa striker hian July 26 khan pound maktaduai 75.3-in Juventus chu kum nga chhung atan a zawm a, Napoli aṭanga Turin khaw club zawmtu hian a man zat a phu lo nia sawiseltu a ngah hle.
Pre season-ah Juventus kawr hain Argentine striker a inlan ta ngei a, chawlh a hmang nuam mah mah em ni aw? tih turin a dul kiar chu hai rual a ni lo a, khawvela club ṭha ber pawl striker hian seltu a neih belh a, nuihzat a hlawh.
Season hman zawh taka goal 38 a khung sak Napoli fan-ten an diriam nasa lehzual a, an club innghahna khawpui Naples-a infiamna bungrua zawrhna hmunah te chuan Higuain hming chuanna Juventus jersey chu a dul hnawhpuarin an pho chhuak a, an striker chhuanvawr ni ṭhin hi nuihza siam nan an hmang.
Higuain a inlar!
Sawiselna tam tak karah Higuain a ngawi reng a, amah elhsentu te a chhanletna chu khelmual chhungah a ni. Argentine striker hian Juventus tana Serie A match a khelh hmasak berah Fiorentina hmachhawnin 1-1 a an inhneh-tawk laiin bench aṭangin a tlan lut a, a ball khawih hmasak ber chu goal-ah chantir nghalin a team thar hi 2-1 in hnehna a chanpui!
Juventus ṭantute an striker thar lawmin an lam a, Higuain seltu te an hawihai thung. Real Madrid striker hluiin
ṭawngchhuah hun a ni tih a hria a, 'thau' tia sawiseltute chhanglet nghalin, "Ka thau thu an sawi hian min ti buai lo a, hetianga min elhsen hi ka tan chuan a
ṭhatna lai tak a awm. An duh phawt chuan Pathau tiin min ko zel se la, keiin goal ka khung zel thung ang," a ti!
Striker thawkrim
Europe-a a zinkawng Real Madrid-a ṭantu striker hian Spanish club tan season sarih a khelh chhungin match 264 a inlanah goal 121 a khung a, Napoli tan season thum chhungin vawi 146 inlanah goal 91 tehmeuh a khung sak bawk.
Hetichung hian Argentina tana vawi 62 inlana goal 30 khungtu striker hian thawhrim a bansan chuang lo. Season hmasa Serie A top scorer chuan, "Mi min sawiselna hian min ti buai ve lo a, ka theihna leh thiamna ka hriatchian em avangin ka inringhlel ngai lo. Ni 20 chhung chu rim takin training ka nei leh tawh a, engtiklai pawha hmasawn hi ka duh ber chu a ni," tiin a thlen chinah a la lawm tawk loh thu a sawi.
Higuain a hlim
Argentine club ṭha River Plate-a a career ṭantu Higuain hian Juventus-ah lawm a hlawh a, khelmuala a inlan ṭum piahlamah training ground thlengin fan-ten amah lawmin kut an beng ṭhin.
Higuain chuan, "Ka hming lama an zai ka hriat khan nuam ka ti em em a, Juventus fan-ten min thlawp tlat a ni tih hriatna hian hei aia ṭha zawka khel tur hian min fuih a ni. Ka goal khung pawh kha min ṭan tlattu te tan ka hlan a, ka tan an awm reng ṭhin a, engtiklai mahin min ringhlel ve ngai lo," tiin fan-te a fak.
A hmasa berah team
Juventus-a zawm tirha a man phu tawka khelhchhuah ngei a tum thu sawitu Higuain chuan mimal hlawhtlinna aia club dinhmun chu thil pawimawh zawk a nih thu a sawi.
Season hman zawh taka league goal 36 khunga Serie A season khata goal khung hnem ber record kum 87 chhung lo ding tawh nihrualtu striker chuan, "Kan match hmasa bera kan chak avangin kan lawm a, mah se match 37 khelh tur kan la hmabak tih kan hai lo. Match lehah inkhel bul ka ṭan dawn leh dawn lohin min tibuai lo a, ka team tana theihna zawng zawng pek hi ka duh ber chu a ni," a ti.
Higuain chuan sawi chhun-zawmin, "Team kan inlungrual em em a, tlar hmaa ka inelpui Mario Mandzukic nen pawh kan inkawmngeih nghal a, hei hi team-in nomawi kan chawi dawn chuan a pawimawh a ni. Ka teammate tharte an fel em em vek a, he hmunah hian rei tak awm tawh ang mai ka ni. Khawvela thiam ber kianga i khel a nih chuan i theihnaah i chiang lehzual ang," tiin a club thar Juventus chu khawvela club ṭha berah a ngai.