Premier League-in October-ah entu awm duh

Khawvela football league ngaihven hlawh ber tih ngam Premier League club-te chuan UK sorkar chu ruahmanna a lo neih tawh saa ding nghet turin an ngen a, Ocotber 1-ah chuan khelmualah fan-te punkhawm phal tawh turin an ti. 

UK-ah hian October-ah chuan infiamna hrang hrang te chu a hmuna entu awm thei tura ruahmanna siam tum a ni a, mahse tun hnaiah UK hmun ṭhenkhata Covid-19 hri leng a pun avangin sorkar chuan ngaihtuah nawn turin a ti a ni. 

Mahse, Ningani khan Premier League club aiawhte chu an inhmukhawm a, stadium chu, "Mipui punkhawmna hmunah chuan a him ber pawl a ni dawn a ni," tiin UK sorkar chu entu awm phal turin an ngen. 

Premier League chuan, "Club-te chuan fan-ten him taka league an en theihna turin theihtawp a chhuah dawn a ni," an ti a, "League leh Club chuan sorkar chu October 1 a entu awm phal tura a lo inruahman tawhna anga kaltlang turin kan ngen a ni," an ti bawk. 

Covid-19 vanga March thlaa England-a inkharkhip kalpui a nih hnu khan infiamna tam zawk chu entu awm lo tura kalpui nghal a ni a, hei hian nasa takin fans aṭanga infiamna khawvelin sum a hmuh ṭhin chu a nghawng. 

Ningania Premier League club inhmukhawm chuan, "Entu awm loa inkhelh ngai hian league mai ni loin football pumpui a nghawng a, tualchhuang leh rampum economy thlengin a nghawng a ni," an ti. 

Premier League chief executive Richard Masters chuan stadium-ah fan-ten inkhel an en thei vat lo a nih chuan 2020-21 season-a English top flight league club 20-ten sum an hloh tur chu pound maktaduai 700-a tlin tur thu a sawi.