Dante-a'n Nice a zawm

Brazil international Dante chuan Bundesliga club Wolfsburg aṭangin Ligue 1 club Nice a zawm dawn tih a chiang tawh, nimin khan medical test neiin he thu i chhiar lai hi chuan contract an ziak fel tawh tura ngaih a ni.

Kum 32-a upa Dante hian season hmasa nipui lai khan Bayern Munich aṭangin Wolfsburg a zawm a, match 23 khelin goal khat a khung.

Brazil tana match 13 khel tawh defender chuan, "Wolfsburg-ah khan kum khat chauh hun hmang mah ila hmelhriat leh ṭhianṭha ka chhar hman ṭeuh a, anni nen khan hun nuam leh hlimawm tak kan hmang. An kal zelna turah duhsakna ka hlanin hma an sawn zel pawh ka beisei," tiin a sawi.

French Ligue 1-ah Dante hi a mikhual dawn lo, kum 2004-2006 khan Lille tan match 12 a lo khel ve tawh a ni. Inrinni zan hian a league match hmasa ber a khel a nih chuan a club hlui hi a hmachawn nghal dawn tihna a ni ang.