Olympic-ah India a mualpho? Tui min petu ka nei ve lo - Jaisha

Rio Olympic 2016 hmei-chhe marathon intlansiaka India aiawhtu Jaisha Orchatteri Puthiya Veetil chuan inelna an neih lai khan kawng lakah tui leh eitur petu a neih ve loh thu a sawi! Hei hian ramchhung infiamna chanchin thar a luah hneh hle a - sports minsiter Vijay Goel a
ṭawng chhuak nghal bawk.

Hmeichhe marathon-ah khan 42km a thui tlan niin kawng lakah inelna buatsaihtu lam hian 8km dan zelah tui intur an lo pe zel. Ram tinin an infiammite tan 2.5km dan zelah tui leh eitur an lo pekna tur ruahman sak an ni bawk - Jaisja-i'n tui leh eitur petu a nei lo hi thil mak a ni.

Ram hrang hrang 80 aṭanga intlansiak 157 zinga 89-na O. P. Jaisha chuan, "Zing dar 9:00-ah intlansiak kan ṭan a, inelna butsaihtu ten 8km dana tui leh eitur an lo chhawp ringawt kha chu a tawk zo lo a ni. Ram dangte chuan puibawmtu an nei vek a, keni erawhin kan nei ve lo. Tunge dem tur ka hre bik lo a, mahse inelna hautak tak a nih zia hi min ngaihtuah pui lo niin a lang," a ti.

Kum 33-a upa Jaisha chuan sawi chhunzawmin, "Inelna buatsaihtute hnenah khan tui leh eitur min petu an awm loh chhan ka zawt a, chhanna erawh ka hmu lo. Ka taksa a chau a, dinhmun
ṭha lo takah ka din phak ni hialin ka hria," a ti.

Hmeichhe marathon inelnaah hian Kenya nula Jemima Jelagat Sumgong chu 2:24:04 chhunga thlengin pakhatna a ni a, Jaisha hian 2:47:19 hun hmang thungin India nula pakhat zawk Kavita Tungar (2:59:29) chu 120-na a ni thung - mi 24 zet an tlan tluan thei lo thung.

India hi silver leh bronze me-dal pakhat dawngin lawm viau mah se chanchin duhawm lo rawn lang chhuak hian sports minister Vijay Goel beng a thleng rang hle.

Sports minister Vijay Goel chuan, "Thil thleng engkim kha chhinchhiah vek a ni a, he thilthleng hi Athletics Federation of India (AFI) hna niin an mawhphurhna a ni bawk," tiin a sawi a, hma lak dan tur erawh a la sawi lang tel lo thung.

Hetihlai hian AFI lam pawh-in insawi thiamna an nei ve tho. AFI secretary C K Valson chuan an mawhphurhna a nih rualin coach ten an mamawh leh tum ang chu an hrilh hre tur niin a sawi ve thung.

AFI chuan thuchhuah siam-in, "Team zawng zawngte tui in tur leh mamawh chu an duhthlannain buatsaih sak an ni. Hmeiche marathon inelna neih hma zan hian Indian team manager chuan tui bottle ruak 16 chu Jaisha leh Kavita Raut tan coach Nikolai Snesarev hnenah a pe a, an duh ang zawng thun thei turin duhthlanna a pe. Mahse, heng athlete pahnihte hian an mamawh loh thu leh an duh a nih chuan inelna buatsaih tute chhawp chu an rin mai tur thu an sawi," tiin an sawi ve thung.

AFI hian sawi chhunzawmin mipa marathon inelna lama inlan pathumte chuan an coach Surender Singh-a'n a lo hrilh lawk angin tui leh eitur an mamawh an dawn thu an sawi tel bawk.