Sindhu leh Sakshi chawimawiin an awm zel

Rio Olympic neih zawh a ni a, India aiawha infiammi fehchhuak 117 zinga medal la thei chu pahnih chauh an ni. Badminton-a silver medal dawngtu P.V. Sindhu leh bronze medal dawngtu wrestler Sakshi Malik te chu Sports Ministry chuan India rama infiammi te chawimawina sang ber Rajiv Gandhi Khel Ratna Award dawng turin a thlang.

Gymnast Dipa Karmakar chuan India tan medal hawn thei lo mah se Indian hmeichhe zinga Olympic-a gymnastic final lut thei hmasa ber a nih miau avangin Khel Ratna dawng tur zingah a hming chhawpchhuah a ni a, shooter Jitu Rai hming a lang bawk. Kumin hi kum 1991-a Khel Ratna sem a nih aṭanga infiammi pali hnena chawimawina pek a nih hmasak ber a ni.

Ministry of Youth Affairs and Sports chuan Khel Ratna dawng tur bakah hian Arjuna Award (15), Dronacharya Award (6) leh Dhyan Chand Award (3) dawng tur hming a puang chhuak nghal bawk a, Arjuna Award dawng tur India goalkeeper Subrata Paul leh cricketer Ajinkya Rahane te chu hming langsar zinga mi an ni.

Rajiv Gandhi Khel Ratna Award leh Arjuna Award dawng tur thlang chhuak tur hian Sports ministry chuan committee a din a, kumina selection committee chu Delhi High Court judge chawl tawh Justice S.K. Agarwal chuan a kaihruai a, Dronacharya Award leh Dhyan Chand Award dawng tur hi Manipuri boxer Mary Kom kaihhruaina hnuaia thlan a ni thung.

Khel Ratna bihchianna

Kum 1991-1992 aṭanga sem ṭan Rajiv Gandhi Khel Ratna Award hi kum 1984-89 chhunga India prime minister Rajiv Gandhi-a hmingchawia siam a ni a, lawmman hian medal, certificate leh Rs. 7,50,000 (nuai sarih leh sing nga) a keng tel.

Khel Ratna Award dawng tur hian kum li chhung a zawna mahni infiamna ṭheuha hlawhtling taka khelh a ngai a, kum 2008 leh 2014 te khan he chawimawina dawng tur khawpa che ṭha tawk infiammi zingah an awm loh avangin sem a ni lo!

Chawimawina semchhuah a nih hmasak ber kum hian chess vanga khawvel hriat hlawh Viswanathan Anand chuan a dawng a, kum 2001 khan shooter lar Abhinav Bindra chuan kum 18 leka upa nichungin Khel Ratna hi lo dawng tawhin India rama infiammi chawimawina sang ber dawng thei naupang ber a ni.

Infiammi langsar zingah cricket legend Sachin Tendul-kar, tennis star Leander Paes, badminton legend leh Olympic khelh zawh taka PV Sindhu coach Pullela Gopichand, India cricket team captain MS Dhoni, badminton world no. 1 hlui Saina Nehwal leh boxer Mary Kom te chuan he chawimawina hi an lo dawng tawh.

Arjuna Award leh football

India rama infiammi chawi-mawina sang ber dawttu Ar-juna Award dawng tur hian infiammi tan international huap infiamnaah kum thum chhung a zawna chet ṭhat a ngai a, hei mai hi a tawk lo. Infiamna tualah infiammi nunphung dik tak a phochhuak tur a ni a, mahni inthunun thei mi a ni tur a ni a, midangte kaihruai thiam tak nih a ngai bawk.

He chawimawina hi kum 1961 khan semchhuah ṭan a ni tawh a, bronze hmanga lim siam leh Rs. 500,000 (nuai nga) a keng tel ṭhin. Arjuna award hian pianphunga rualbanlo infiammi pakhat tal chawimawina an pe ziah bawk.

Kumin Arjuna Award dawng tur zingah Mizo te ngainat football aṭangin goalkeeper lar Subrata Paul hming a lang a, footballer zinga he chawi-mawi-na dawng thei 23-na a ni a, tun hnaia Indian footballer zingah Baichung Bhutia, Deepak Kumar Mondal leh Sunil Chhetri te chuan he chawi-mawina hi an lo dawng tawh.

Dronacharya Award

Kum 1985-a sem chhuah ṭan Dronacharya Award hi infiammi ni loin coaching lama che ṭha leh hmingṭha te hnenah pek ṭhin a ni thung. Dronacharya Award hian bronze hmanga siam trophy bakah Rs.7,00,000 (nuai sarih) a keng tel. Kumina he chawimawina dawng tur zingah hian Dipa Karmakar-i coach Bishweshwar Nandi chu thlan chhuah zingah a tel.

Chawimawina semchhuah tur zinga mi Dhyan Chand Award hi lifetime achievement award niin kuminah hian a dawng turin mi pathum an thlang chhuak a, kum 2002 aṭanga sem ṭan kha niin chawimawina hian Rs. 500,000 a keng tel a ni.