Paralympics-ah Russia tel dawn lo

Rio Olympic neih zawh a ni a, pianphunga rualban lo infiammite tana buatsaih ṭhin Rio Paralympics-ah Russian infiammite chu an tel ve phal sak a ni dawn lo.

International Paralympic Committee chuan Russian infiammite hi an ram sorkar hriatpuina thlapa dan an bawhchhiat avangin Rio Paralympics-ah hian an tel ve a phal lo a, infiamna lama thubuai ngaihtuahtu sang ber Court of Arbitration for Sport (CAS) hnenah zualko mah se an hlawhtling ta chuang lo.

CAS chuan Russian Paralympic Committee chuan IPC-in an hremna hi a dik lo ngei a ni tih finfiahna an pek theih loh thu an sawi a, heivang hian IPC-in Russia a hremna chu kaltlangpui an ti tlu ta zawk a ni.

Rio Olympic neih a nih dawn khan Russia infiammite chuan hetiang chiah hian buaina an lo nei tawh. Mahse, anni erawh chu International Olympic Committee (IOC)-in an infiamna board ṭheuh thutluknaa a dah avangin Russia infiammi engemawzat an inlan tho a, World Anti-Doping Agency (WADA) thurawn ngaipawimawh loa puhin IOC hian sawisel an tawk nasa hle.