Nomawi beisei vanga Chelsea thlangtu Werner

Pathianni zan Premier League inkhel boruak tisang zual turin Chelsea forward Timo Werner a ṭawng chhuak a, Liverpool nena sawi zawm hlawh tawh ṭhin German striker hian Chelsea chu nomawi chawi a duh vanga thlang a nih thu a sawi!

Kum 24 mi striker hian June thla khan RB Leipzig aṭangin Chelsea hi pound maktaduai 47-in a zawm a, kum nga chhung atan contract-a ziak  - player goal khung thei leh tlan chak a ni.

Werner chuan, "Leipzig chhuahsan tura thutlukna ka siam khan club hrang hrang nen kan indawr a, Liverpool pawh an tel ngei a ni. Mahse, Chelsea pan chu ka tana thutlukna ṭha ber tur a ni tih hriain ka titlu a ni. 

"An khelh dan phung a ni mai lo a, ka hmaa an thil pholan khan min hneh a ni. Thutlukna harsa tak a ni a, mahse hetianga thutlukna ka siam ta hi ka lawm khawp mai. He hmunah hian nomawi chawi turin ka lo kal  a ni," a ti a, Chelsea tan nomawi chawi a tum - Pathianni zanah champion nomawi kawltu hmaah fiahna hmasa a hmachhawn ang.