BVT penalty hlah zarzotu Aizawl FC

Bethlehem Vengthlang FC-in penalty shootout-ah goal zawnah an pet ngam lova, Aizawl FC-in an pet goal vek a, 4-1 a chakin Samsung 3:16 Plan Solution MFA Super Cup semi final an lut.

Nimin tlai khan Lammualah MFA Super Cup 2015 final re-match kan hmu a, hun pangngaiah goal a lut lo. Penalty hmangin 'ṭhumvawr' a ni a, Independence Day Football-a penalty shootout hmang bawka champion Aizawl FC an chak.

Aizawl FC hian Spanish manager Manuel Retamero hoin nikum MFA Super Cup-ah BVT an hneh lo a, I Day Football kum zawna champion puitu K. Malsawmkima kaihhruainain phuba an la - an vanneih a kal tluang zel. Nizana Venghlui FC leh Chawnpui FC chak zawk nen semi final an khel ang a, nizan inkhel result erawh kan tarlang hman lo.

Mends-a hoin

Aizawl FC-in third division club Bungkawn FC hneh turin Bright Middleton Mends an mamawh a, coach Mala sawi ang ngeiin Ghanaian forward hian inkhel bul ṭanin a kawppui chu club academy chhuak Lalremsanga a ni.

Tlar hma tichak turin Albert Zohmingmawia leh Brandon VL Remdika te wing-ah a nchhawr a, an fimkhur tih nemngheh nan I Day Football final ang chiahin tlar hnung an rem bawk.

BVT kawr nen Rammawia

Bethlehem Vengthlang FC-in Thawh-
ṭanniah midfielder Lalrammawia chu loan-in second division club Youngstar United, ITI aṭangin an lalut a, Aizawl FC hmachhawn turin inkhel bul ṭantir nghal a ni.

BVT coach Lalbiaksanga Colney-in Tuidam an hneh ṭuma tlar hmaa an dah Laldinpuia chu tlar hnung tikhawng turin H. Lalhlimpuia nen a inkawptir a, striker mal tlat PC Zosanga thlawp turin player thar Rammawia chu chhawr a ni.

Venghimtu Mala

First half-a player langsar ber chu Malsawm­dawngzela a ni a, ṭan phat aṭangin BVT keeper hian hna a ngah hle.

Mends-a'n a tlan chak vangin chance ṭha nei nghal mah se Ghanaian forward finishing a ṭha tawk lo. Aizawl FC-in inkhel an thunun a, an tlar hmaten chance a inhlah siak a ni ber.

BVT keeper Mala'n Ghanaian forward Mends, Remsanga leh Lalruatthara-te goal khung tur a dan sak vek bakah Zoramthara, Rohmingthanga, Brandon leh Albert-te'n an hun ṭha neih chu goal zawnah an pet lo vek bawk. AFC winger Albert hian chance ṭha ber a hlah a, goal ruakah a khung lo.

BVT lamin hun chanve lamah goal chance vawi khat chiah an nei a, player thar Rammawi­a'n a ke vei lamin goal zawnah a pet lo.

BVT thar

Second half-ah BVT ṭha zawk an inlar a, Lalnghinglova'n (MP-a) goal zawnah pet nghal mah se Lalawmpuia'n ṭha takin a dan sak. AFC keeper AwP-a hian ṭha takin BVT captain Laldingngheta shot-cross a dang bawk.

Aizawl FC-in inkhel an thunun tawh bik lo chungin goal chance ṭha erawh an ngah hret a, goal khung ngeina tur chance erawh an nei tawh lo. Substitute William Lalnunfela cross chuan BVT defender Hmingthanmawia kut a fuh ngeiin a lang a, referee erawhin penalty turah a ngai lo.

Hun tawpah counter attack hmangin BVT-in chance ṭha an nei a, a pawimawh hunah takah a hmawr a bawk fuh loh avangin goal lut loin inkhel a tawp.

Penalty chu

MFA Super-ah Cup extra time khelh a ni lo a, penalty shootout-ah Aizawl FC tana pettu Lalramchullova, Zoramthara, Rohmingthanga leh Lalrinzuala Khiangte ten an pet goal vek laiin BVT tana bul ṭantu H. Lalhlimpuia leh PC Zosanga ten goal zanah an pet lo.

I Day Football final-ah Aizawl FC-in Ramhlun North penalty hmangin an hneh tawh a, MFA Super Cup semifinal thleng turin BVT chu penalty shootout-ah 4-1 in an hneh leh ta - season hmasaa an lak loh awm chhun MFA Super Cup lak ngei an tum.