Europa League khel turin Spurs dinhmun a ṭha

Tottenham Hotspur boss Jose Mourinho-a'n a squad neih ṭhat ber fehchhuahpui chungin Bulgaria-ah hnehna a chang hram a, player pakua nichunga hun tawp hmang Lokomotiv Plovdiv chu 2-1 in an hneh. 

Ningani zan khan Europa League second qualifying round khelh a ni a, Spurs hian khualmualah Plovdiv hi an lenchilh - mualneitu team lamin Spurs barakhaihin Georgi Minchev chuan minute 71-naah goal hmahruai a khung. 

Mahse, London club tan vanneihna a her chhuak a, mualneitu team player Dinis Almeida (78') leh Birsent Karagaren (79') hnawhchhuah an nih hnuah goal hnih an khung a, 2-1 in an chak. 

Spurs goal hmasa zawk hi Kane-a'n penalty aṭanga a khung a ni a, goal hnihna hi hun tawp nan minute nga chauh a awm tawh tiha Tanguy Ndombele tih luh a ni. 

Kum 23 mi Ndombele hi season hmasa khan Jose Mourinho chuan langsar takin a lo sawisel tawh ṭhin a, mahse Spurs manager chuan a ngaihdan thlakin, "Tun dinhmunah chuan Tanguy-a chungah hian rinna ka nghat tawh a ni," a ti. 

Spurs-in Europa League third qualifying round an lut a, Premier League lam an hawi zui leh ang. London club hian Pathianni tlai dar 4:30-ah Southampton an lenchilh dawn a, match hmasa berah Everton an ngam loh avangin tlawm nawn a thiang lo.