Dortmund tan Sancho inlan dawn

Manchester United-in thapui thawha lakluh an tum Jadon Sancho chu zanin dar 10:00 hian Bundesliga-ah a inlan dawn. England international awmna club Borussia Dortmund chuan season thara an league match hmasa ber atan Borussia Monchengladbach an mikhual ang.

Nipui bazar lai a ni a, player chhuak tur leh lak thar thawm a tam. Transfer thuthang zingah chuan United leh Sancho ten thawm an nei lian, amaherawhchu an inbiakna leh thu thang vel hi a taka chantir a la ni lo.

Dortmund player department lama an hotupa Sebastian Kehl chuan, "Jadon Sancho hian tun season chu Dortmund tan a khel ang," tiin a sawi chiang a, amah duha hel rengtu English club tan thu ngaihthlak nuam lo tak a ni ang.

An hmathlir sawiin Dortmund sports director Michael Zorc chuan, "Jadon hoin season thar kan hmang dawn, hmachhawp pawimawh tak kan neihah hmun lailum a chang ang. Keini chuan thutlukna kan siam fel tawh," tiin a sawi bawk.

Zanin Signal Iduna Park-a inkhelah hian a hmunah entu an awm thei dawn. Amaherawhchu mikhual team ṭantu an kal thei lo ang, mualneitu lamin fans 10,000 an nei thei dawn - German sorkar chuan club hnenah hian fans neih a phalsak.

Covid-19 vangin season hmasa a khaihlak tawh a, league an khelh chhunzawm hnuah pawh a hmuna entu awm loin an inkhel ṭhin. Season thar an ṭan turah erawh sorkar lamin inkaihhruaina dan an siam hmangin a hmuna entu an awm thei tawh dawn.

Dortmund chief executive Hans-Joachim Watzke chuan, "Keini chauh kan ni lo, club, player leh hetiang thutlukna siamtu zawng zawngte chungah lawmthu ka sawi takzet. Hun rei tak hnuah hetiang a thleng leh thei tur hi a lawmawm," tiin a sawi.