Euro U21-ah Sweden an champion
Sweden-in European Under 21 Championship final-ah Portugal penalty shootout-a hnehin a vawi khatna atan an champion. Thawhlehni zana final khelh zawh takah hian hun pangngaiah goal a lut lo a, penalty shootout-ah Sweden 4-3 in an chak.
Portugal-in semifinal-ah champion tura rinkai Germany 5-0 in an hneh a, final boruak a dang thung.
Stadion Eden, Prague-a final khelhah Portugal-in inkhelh ṭan tirhah ball an chang tam a, minute 10-na lekah Sergio Oliveira-a'n crossbar a pet per nghal.
Sweden lamin goal venhim hna an thawk a, Portugal-in chance ṭhahnem tak an insiam a, goal an khung thei lo.
Second half chawhnu lamah Sweden game a ziaawm a, goal khung tur khawp chuan an nawr na tawk lo thung. Minute 90 zawhah goal a lut lo a, inkhelh ṭan aṭanga darkar hnih a ral hnuah pawh goal luh loh avangin penalty shootout pet a ngaih phah.
Penalty shootout-ah Sweden keeper Patrik Carlgren-a'n midfielder Ricardo Esgaio pet a dan sak a, mah se Abdul Khalili-a'n dinhmun ṭha zawkah Sweden a dah thei lo.
Sudden death-ah Sweden tan Victor Lindelof-a'n a khung a, Portugal tan Arsenal nena sawi zawm William Carvalho-a'n a hlah avangin Sweden an champion.
Champion kalkawng
Sweden champion kalkawng hi a hautak hle. Group match hmasa berah Italy 2-1 in an lehthal a, match hnihnaah England lakah 1-0 in an tlawm.
Group match hnuhnung berah Sweden-in Portugal an draw hram a, England-in Italy an hneh loh vang chauhin semifinal an thleng.
Semifinal-ah Sweden-in Denmark 4-1 in hneh mah se goal luh dan aṭanga ngaihdan siam theih a ni lo.
Inelna neih zawh takah hian match 15 khelh a ni a, goal 37 a lut. Tottenham Hotspurs forward Harry Kane-a'n goal a khung lo a, inelnaa goal khung tam ber Czech Republic striker Jan Kliment-a'n goal thum chauh a khung.
Champion zo ta lo mah se Portugal midfielder Bernando Silva chu player of the tournament a thlan a ni. Silva hi January thla khan Monaco-in pound maktaduai 13.9-in Benfica aṭangin an la lut a, tun transfer-ah French club hi a chhuahsan mai a rinawm loh.